Быў выпадак
Дапамога
Незвычайныя здарэнні іншы раз адбываюцца ў жыцці.
Да аквалангістаў, якія вывучалі дно акіяна, нечакана
падплыла кітовая акула. На яе целе, каля галавы, вісеў тоўсты трос з вяроўчыны
(мабыць, ён быў ад рыбалоўнага трала). Аквалангісты зразумелі, што кітовая
акула (яна звычайна харчуецца планктонам – дробнымі расліннымі і жывёльнымі
арганізмамі, якія жывуць у тоўшчы вады і перамяшчаюцца разам з цячэннем)
прыплыла, каб людзі дапамаглі ёй.
Даследчыкі аіяна пашкадавалі жывёліну: нажамі, добра
пастараўшыся, перарэзалі трос і скінулі яго. На целе акулы застаўся глыбокі след
ад троса.
Канешне, неўзабаве ён зажыве, і кітовая акула зноў адчуе
сябе сапраўднай гаспадыняй акіяна.
А гэта ўжо здарылася на сушы, на зямлі.
Сярод белага дня з лесу выйшаў воўк і наблізіўся да жанчыны,
якая знаходзілася каля сваёй хаты. У яго былі параненыя лапа і галава. Мабыць,
так моцна ён пацярпеў у час сутычкі з супляменнікам. Не пашанцавала яму.
Жанчына не спалохалася: пакарміла галоднага і параненага
драпежніка. Потым ён яшчэ некалькі разоў выходзіў з лесу, каб пачаставацца і
набрацца сілы.
Нешта падобнае адбылося і ў бульдазерыста, які працаваў у
лесе. Да яго аднаго разу наблізілася ліса.
На працягу некалькіх тыдняў бульдазерыст не толькі карміў
лісу, але і размаўляў з ёю. Яна заўжды ўважліва выслухоўвала яго.
Аляксей Якімовіч
