Экспертыза “Кантрольная па матэматыцы”
У выпускным класе праводзілася
кантрольная работа па матэматыцы, якая вырашала, якую адзнаку я атрымаю за год,
а, значыць, і ў атэстат. Мой аднакласнік Андрэй (у нас з ім быў адзін варыянт),
больш моцны за мяне матэматык, сказаў, каб не хваляваўся, запэўніў, што
дапаможа мне. Але ў час напісання кантрольнай ён праігнараваў усе мае просьбы,
зрабіў выгляд, што не чуе і не бачыць мяне. У выніку я атрымаў не вельмі
высокую адзнаку.
• Як Вы, нашы эксперты, ацэньваеце гэту сітуацыю?
• Што зрабілі б у дадзеным выпадку?
Эксперт Наташа.
-- Канешне, Андрэй паступіў непрыгожа,
подла. Але з любой сітуацыі, нават з самай подлай, трэба вынесці нешта
станоўчае. Думаю, што яна навучыла аўтара гэтага допісу спадзявацца не на
каго-небудзь, а ў першую чаргу на сябе.
Эксперт Максім.
-- Што я параіў бы аўтару гэтага допісу?
Асцерагайся падобных сяброў, трымайся як мага далей ад іх.
Эксперт Даніла.
-- Дадзены эпізод я не пакінуў бы без
увагі. Калі б адпаведным чынам склаліся абставіны, то абавязкова адпомсціў бы
Андрэю, належным чынам адплаціў бы яму.
Эксперт Галя.
-- А я пастаралася б абыходзіць яго. Ён
для мяне, калі б зрабіў нешта падобнае, назаўжды стаў бы пустым месцам.
Эксперт Алесь.
-- Даверыўшыся Андрэю, аўтар допісу,
мабыць, як след не пралічыў сітуацыю. Думаю, што нейкія паскудствы, не такія
прыкметныя, Андрэй рабіў яму і раней. Трэба было падумаць пра гэта,
паразважаць, успомніць.
• А як да гэтай сітуацыі адносіцеся Вы, нашы чытачы?
