Калі чую словы “абаранкі”, “брод”
Уяўленні,
якія ўзнікаюць у мяне, калі чую слова “абаранкі”.
Эпізод з майго дзяцінства.
Бацька альбо маці (гэта было не так
часта) звычайна пасля паўдня прыязджаюць дамоў з нашага раённага горада
Слоніма. У напакаванай, звітай з доўгай вяроўчыны сетачцы яны прывозяць разам з
іншымі пакупкамі абаранкі. Пахучыя, з мяккай ружовай скарыначкай, гэтыя
прысмакі нанізаны на тонкую светлую вяроўчыну і магнітам цягнуць да сябе.
Зняўшы з чароўнай нізкі некалькі
абаранкаў, мама працягвае іх мне. Бяру і ем няспешна, смакуючы, каб на даўжэй
расцягнуць радасць, задаволенне. Мне здаецца, што гэта самы смачны пачастунак
на свеце.
• А якія ўяўленні ўзнікаюць у вас, калі чуеце слова “абаранкі”?
Вершаваная
трэніроўка.
• Замест кропак падбярыце (устаўце) патрэбныя словы з пяці і сямі літар.
Падказкі.
Слова з пяці літар: назоўнік, які абазначае
зімовы транспарт.
Слова з сямі літар: назоўнік, які
абазначае летнюю з’яву прыроды.
Слова “абаранкі”
Рыфмуецца са словам с..,
Яму сугучна і слова м.. .
Уяўленні,
якія ўзнікаюць у мяне, калі чую слова “брод”.
Мая родная вёска Парэчча стаяла і стаіць
(дзякуй Богу) на беразе ракі Шчары. Месцамі хуткая, імклівая, яна цячэ, каб
сустрэцца з бацькам Нёманам і напоўніць яго сваёю чыстаю вадою.
Насупраць нашай вуліцы, там, дзе вёска
заканчаецца, самае плыткае месца ў Шчары -- брод. Улетку праз брод можна было
перайсці на другі бераг ракі, за калені падкачаўшы клешні нагавіцаў. Вада тут
светлая, а дно ружовае, пясчанае, мяккае. Не раз і не два брыў я па вадзе,
узіраючыся пад ногі. А вада цякла ўдалеч, мінаючы мяне. Гэта назаўжды засталося
ў памяці, як і словы “маці”, “Радзіма”.
• А якія ўяўленні ўзнікаюць у вас, калі чуеце слова “брод”?
Вершаваная
трэніроўка.
• Замест кропак падбярыце (устаўце) патрэбныя словы з сямі і васьмі
літар.
Слова “брод”
Рыфмуецца са словам к..,
Яму сугучна і слова
к.. .
Падказкі.
Слова з сямі літар: назоўнік, які
напамінае нам пра вясёлы танец вакол навагодняй ёлкі.
Слова з васьмі літар: складаны назоўнік
(з двух асноў), які абазначае з’яву прыроды, якая адбываецца вясною, калі па
рацэ плывуць крыгі (кавалкі) лёду.
Для
даведкі (выкарыстоўвайце толькі для кантролю патрэбныя
словы, напісаныя наадварот): ікнас, ікналам; догарак, дохагырк.
Распрацаваў Аляксей Якімовіч