Быў выпадак
Акула і іншае
У свеце ёсць розныя экстрэмалы, якім, як гаворыцца,
карціць паказаць сябе і праверыць сваю сілу.
Адзін з такіх экстрэмалаў у Аўстраліі задумаў пакатацца
на акуле. Сваю ідэю ён спачатку выношваў у галаве, а потым вырашыў ажыццявіць
на практыцы. Некалькі дзён, набраўшыся цярпення, чакаў, калі акула з’явіцца
непадалёку ад берага. І дачакаўся. Спачатку ўбачыў яе вялікія плаўнікі, а потым
і магутную спіну. Аўстраліец-экстрэмал падплыў да драпежніцы і ўскочыў на яе,
ухапіўшыся за плаўнікі. У той момант яму, напэўна, здалося, што гэта імклівы
конь, на якім можна крыху пакатацца.
Але акула думала па-іншаму. Не спадабаўся ёй экстрэмал.
Яна ўзнялася над вадою, скінула яго, а затым накінулася, стала бязлітасна
кусаць. На шчасце, побач знаходзіліся добрыя людзі. Яны адагналі акулу і
выратавалі смельчака.
А вось другая акула на ўзбярэжжы, там жа, у Аўстраліі,
напала на дванаццацігадовую дзяўчынку.
Як гэта здарылася? Дзяўчынка наблізілася да акулы,
убачыўшы яе. Відаць, цікаўнасць перамагла страх. Драпежніца толькі і чакала
гэтага. Яна напала на дзяўчынку і сваімі вострымі зубамі моцна пакусала.
Дваццаць ранаў потым налічылі лекары на нагах дзяўчынкі.
Які вывад можна зрабіць? Будзеце ў Аўстраліі –
асцерагайцеся акул. А ў Расіі, як гэта ні дзіўна гучыць, трэба асцерагацца
змеяў, якія знаходзяцца ў заапарках. У сродках масавай інфармацыі прамільгнула
паведамленне, што ў адным расійскім горадзе, у заапарку, змяя атакавала (не
магу сказаць, як ёй удалося выбрацца на волю са свайго памяшкання-тэрарыума)
пяцігадовую дзяўчынку і, падскочыўшы, абматалася вакол яе шыі.
Няшчасную расіянку, як і аўстралійку, выратавалі,
пазбавілі ад агрэсіўнага паўзуна.
Аляксей Якімовіч
