З
напісанага даўней
Чалавек
рэдкай прафесіі
Гайдзінскаму Паўлу Іосіфавічу 75 гадоў. Ён рэстаўратар
кніг пры цэнтральнай бібліятэцы горада Слоніма. З 1943 года Павел Іосіфавіч
ваяваў з нямецка-фашысцкімі захопнікамі. Спачатку быў снайперам, а потым дывізійным
разведчыкам 59 дывізіі арміі генерала Чуйкова. Быў двойчы паранены.
“Павел Іосіфавіч надзвычай цікавы чалавек. Ведае шмат
прыказак, прымавак, беларускіх баек і вершаў. Хоць ён адмысловы майстар, але
ніколі не чураецца адрамантаваць дзверы, замок і нават парасон”, -- так коратка
ахарактарызавала Гайдзінскага загадчыца аддзела бібліятэкі.
Міайстэрня Паўла Іосіфавіча знаходзіцца ў прыстасаваным
паўпадвальным памяшканні будынка цэнтральнай бібліятэкі. Яно ўтульнае, падобнае
на незвычайны хатні пакой. Напэўна, таму, што менавіта Павел Іосіфавіч змог
надаць яму такі прывабны выгляд. На акуратна збітых паліцах кнігі: ужо адрэстаўрыраваныя
і тыя, якія прызначаныя для рэстаўрацыі.
У Паўла Гайдзінскага няма спецыяльных прыстасаванняў.
Толькі нажніцы, востры самаробны нож, прэс. А яшчэ, канешне, умелыя рукі.
Павел Іосіфавіч на маіх вачах са зношанай кнігі ў мяккай
вокладцы выразаў ілюстрацыю вокладкі і спрытна прымацаваў яе да новай,
кардоннай вокладкі. Гэта быў адзін з фрагментаў крапатлівай працы рэстаўратара
кніг. Пасля гэтага яму неабходна старую вокладку замяніць на жорсткую,
кардонную. А лісты, каб не распадаліся, трэба прашыць. Часта здараецца так, што
ў кнізе лісты парваныя ці наогул вырваныя. Тады іх прыходзіцца перадрукоўваць з
іншай кнігі таго ж самага аўтара і ўстаўляць у кнігу, якая рэстаўрыруецца.
Павел Іосіфавіч рэстаўрыруе кнігі не толькі з гарадскіх,
але і з раённых бібліятэк. Нядаўна “адрамантаваў” кнігі, якія прывезлі з
Мяльканавіцкай і з Сялявіцкай бібліятэкі, а ў першай гарадской бібліятэцы адрэстаўрыраваў
245 кніг.
Паўлу Іосіфавічу падабаецца яго прафесія, бо ён і сам
вельмі любіць чытаць кнігі. У свой час майстар хацеў адкрыць гурток па
рэстаўрацыі кніг, каб школьнікі маглі заняцца карыснай справай, але, на жаль,
не атрымалася.
Сам Павел Іосіфавіч Гайдзінскі навучыўся рамантаваць
кнігі ў святара, з якім некалі жыў у адным доме.
Аляксей Якімовіч, ліпень 1998 года.