Калі чую словы “джала”,
“елка”
Уяўленні,
якія ўзнікаюць у мяне, калі чую слова “джала”.
У дзяцінстве мама, я і мой старэйшы брат
Аляксандар летам часта хадзілі ў лес збіраць чарніцы. Іх у нас называлі чорнымі
ягадамі. Звычайна ў лес адпраўляліся некалькі жанчын разам з дзецьмі, якія жылі
па суседству.
Не раз і не два мы збіралі чорныя ягады
ва ўрочышчы, якое называлася За рэчкай. Чаму так? У той лясной мясціне працякала
вузенькая рачулка, падобная на ручай. За ёю, перайшоўшы па кладцы, зробленай з
бярвенняў, мы звычайна і збіралі ягады. Акрамя чарніцаў, За рэчкай было шмат
вужоў. Часам сустракаліся і гадзюкі. Таму мама прасіла нас, каб уважліва
глядзелі пад ногі.
Праўда, некаторыя з паўзуноў папярэджвалі:
прыўзнімаліся і з пагрозаю сыкалі, высоўваючы джала, што выклікала трывогу,
неспакой. Засталося ў памяці, захавалася.
• А якія ўяўленні ўзнікаюць у вас, калі чуеце слова “джала”?
Вершаваная
трэніроўка.
• Замест кропак падбярыце (устаўце) патрэбныя словы з сямі літар.
Падказкі.
Першае слова з сямі літар: дзеяслоў у
форме прошлага часу жаночага роду.
Другое слова з сямі літар: дзеяслоў у
форме прошлага часу, да якога можна падабраць аднакарэннае слова “класці”.
Слова “джала”
Рыфмуецца са
словам з..,
Яму сугучна і слова п.. .
Уяўленні,
якія ўзнікаюць у мяне, калі чую слова “елка”.
Маё сталенне, маё незабыўнае дзяцінства.
Набліжаўся Новы год. Я папрасіў бацькоў,
каб адпусцілі мяне ў лес: вырашыў прынесці дамоў прыгожую елку. Яны дазволілі,
але папярэдзілі, каб далёка, у самы гушчар, не заходзіў.
Зіма выдалася снежная, марозная. Па
лёдзе перайшоў праз раку Шчару. Лес быў непадалёку, кіламетры два ад Шчары. Але
па глыбокім снезе ісці нялёгка. Ногі правальваліся, коўзаліся ў снежным
покрыве.
Лес, таемны і ўрачысты, накрыты белымі
снежнымі шапкамі, ужо побач. Зялёныя елачкі купінкамі і паасобку паразбягаліся
па ўсім урочышчы. Мне, канешне, хацелася выбраць, высечы самую прыгожую, каб
парадаваць бацькоў, пачуць ад іх пахвалу і ўпрыгожыць нашу хату на навагодняе
свята.
Нарэшце я высек не адну, а дзве елкі,
каб блізкія, родныя мне людзі маглі выбраць прыгажэйшую. Вядома, адразу дзве нясці
было цяжка. Таму спачатку нёс адну; прайшоўшы колькі метраў, пакідаў яе на бязлюдным белым лузе, а потым вяртаўся за
другою, якая ляжала, чакала мяне.
Успацеў, стаміўся, але данёс дамоў дзве
высечаныя елачкі і паклаў на падворку. З хаты выйшлі маці і бацька, прыўзняўшы,
агледзелі елкі з усіх бакоў і пахвалілі мяне, сказалі, што прынёс прыгожыя. Я з
палёгкаю ўздыхнуў і ўсміхнуўся. У гэты марозны дзень адчуў, што самастойна магу
зрабіць нешта важнае.
• А якія ўяўленні ўзнікаюць у вас, калі чуеце слова “елка”?
Вершаваная
трэніроўка.
• Замест кропак падбярыце (устаўце) патрэбныя словы з адзінаццаці і шасці
літар.
Падказкі.
Слова з адзінаццаці літар: назоўнік, да
якога можна падабраць аднакарэннае слова “стрэл”.
Слова з шасці літар: назоўнік, да якога
можна падабраць аднакарэннае слова “нагрэць”.
Слова “елка”
Рыфмуецца са словам п..,
Яму сугучна і слова г.. .
Для
даведкі (выкарыстоўвайце толькі для кантролю патрэбныя
словы, напісаныя наадварот): аларібз, алалкап; аклэртсареп, аклэрг.
Распрацаваў Аляксей Якімовіч