Па старонках дарэвалюцыйных
газет
Не пагадзіліся правіць дарогу
З
Слонімскага павету Гродзенскай губерніі.
Мужыкі
вёсак Парэчча і Задвор’е Кастровіцкай
воласці не пагадзіліся правіць дарогу, што ідзе паміж царкоўнымі і панскімі
землямі. А памешчыкі нашы самыя дарог правіць не хочуць; масты іх
паразвальваліся, і ніхто не прымушае іх папраўляць.
Каля
Дзярэчына маёнтак былога гродзенскага віцэ-губернатара Л-а пабілі на маленькія
фальваркі і прадаюць мужыкам. Але ж мужыкі жаляцца, што зямлю тую ацанілі занадта
дорага. Калі хто хоча купіць такі фальварак праз банк, той мусіць палажыць
залог 50 – 70 руб. Таму шмат беднякоў праз гэта не можа купіць сабе зямлі. А
хто ўсё ж такі згодзіцца плаціць банку вялікія выплаты, той можа хутка згалець,
бо без навукі ды без грошай ён не здолее як трэба наладзіць гаспадарку, каб яна
адразу давала добры даход. Вось і прыходзіцца гэтым людзям шмат гадоў
недаядаць, каб акуратна аддаваць у банк тыя выплаты і не страціць зямлі.
Выбары ідуць дрэнна
Слонім.
Выбары ў Дзяржаўную Думу ў нашым павеце ідуць неяк дрэнна. Мала хто цікавіцца
тым, каго выберуць, бо не маюць надзеі, што Трэцяя Дума будзе мацнейшая за дзве
першыя. І гэта нядобра, калі ўсе так будуць думаць, то ў Думу трапіць шмат
чарнасоценцаў, а тыя аб свабодных парадках клапаціцца не захочуць: ім цяпер
добра.
Па
некаторых валасных выбралі ўпаўнаважаных, што меліся ў Думе дамагацца зямлі і
права, бясплатна збіраць у казённых лясах ягады і грыбы ды пасці жывёлу. Але
што з таго: у губерні нашым цёмным беларусам зноў задураць голавы. Вось і
выберуць на сваю бяду розных чарнасоценцаў (А. Я.: ненавіснікаў Беларусі.).
Наша Ніва, № 31, 21 (25) кастрычніка 1907 г.