Праверце сваю логіку і інтуіцыю. “Белакрылая птушка -4”

 

                      Праверце сваю логіку і інтуіцыю. “Белакрылая птушка -4”

 

Логіка – уменне разважаць і рабіць вывады.

Сінонімы да слова “інтуіцыя”: чуццё, прадбачлівасць, здагадка.

 

У мінскім выдавецтве “Беларусь” выйшла мая кніга “Белакрылая птушка”, у якой змешчаны дзве аповесці і вершы.

 

1. Урывак з фантастычна-дэтэктыўнай  аповесці “Жывое Дрэва”.

-- Сцяпан, не злуйся на Максіма і Юлю! -- неспадзявана прагучала побач.

Ганулька зірнула на дуб-велікан і адступіла.

-- Здаецца, дуб загаварыў! Сцяпанка!..

Сцяпан абняў каханую і прытуліў да сябе.

-- Са страху табе здалося. Выкінь з галавы.

-- Так, гэта я загаварыў, не памылілася Ганулька, -- зноў у цішыні прагучала над палянай.

-- Ты загаварыў? Не хлусіш? -- запытаўся ў дуба-велікана Сцяпан.

Дуб-велікан замахаў голлем, вітаючыся з васілевіцкімі людзьмі.

-- Я ваш даўні продак, які калісьці загінуў і перакінуўся ў гэта дрэва.

-- Як загінуў? -- вырвалася ў Сцяпана.

-- На Васілевічы ворагі хацелі напасці, а я іх заўважыў і падаў сігнал трывогі.

-- Хадзем дамоў! Хутчэй! -- пацягнула за руку Сцяпана Ганулька.

-- Пачакай, -- сказаў Сцяпан і звярнуўся да дуба-велікана: -- Дык ты Жывое Дрэва?

Гэты ўрывак узяты з раздзела:

            а) “Каля дуба”;

б) “Неверагоднае”.

• З двух варыянтаў выберыце патрэбны.

 

2. Урывак з фантастычна-дэтэктыўнай  аповесці “Жывое Дрэва”.

Не пашанцавала бандытам, хоць і вельмі спяшаліся яны. На дзвярах Аксенінай хаты вісеў замок.

-- Старая, відаць, у вёску пабегла! -- сказаў Мішка.

Саўка сеў на лаўку,  якая стаяла каля хаты.

-- Пасядзім, пачакаем. Нам няма куды спяшацца.

-- Хлопцы, хлопцы! -- ушчуваючы, прагаварыў Іванавіч. -- Кіньце вы гэтую брудную справу.

-- Маўчы! -- узбурыўся Мішка і даў Іванавічу па патыліцы.

-- Максімка, мы доўга тут будзем сядзець? -- заварушылася Юля. Яна з Максімам затаілася на ўскрайку гаёчка.

-- Пакуль не возьмем іх, -- адказаў Максім.

Яму вельмі хацелася тут, каля хаты бабулі Аксені, арыштаваць бандытаў. Няхай паглядзела б Юлька, няхай пазайздросціў бы Іванавіч.

Максім у локці сагнуў правую руку, а леваю памацаў мускулы. Сілай бандытаў не возьмеш. Розумам прыйдзецца браць.

Гэты ўрывак узяты з раздзела:

а) “Пераможца”;

б) “Неспадзяваны госць”.

• З двух варыянтаў выберыце патрэбны.

 

3. Урывак з фантастычна-дэтэктыўнай  аповесці “Жывое Дрэва”.

Як два галодныя ваўкі, выбеглі з кустоў Саўка і Мішка і разам гукнулі:

-- Рукі ўгору!

Сцяпан адразу здагадаўся, хто стаіць перад ім. "Рыжы -- Саўка, а чарнявы -- Мішка", -- зазначыў ён пра сябе, успомніўшы, як аднаго разу апісваў яму Максім гэтых бандытаў.

-- Папаўся той, хто кусаўся! -- прамовіў Мішка і шчоўкнуў пальцамі.

-- Вы хто такія? Чаму чапляецеся да мяне? -- дурнем прыкінуўся Сцяпан.

Мішка павёў плячыма.

-- Саўка, ён нос задзірае!

Перад самым носам Сцяпана Саўка патрос кулаком, парослым рыжым шчаціннем.

-- Ты ў мяне глядзі! Муха тармазоў не мае!

Злосць разабрала Сцяпана. Колькі ж можна цярпець? Не так даўно Іванавіч пагражаў, а цяпер гэтыя прайдзісветы кулакамі трасуць. Калі так далей пойдзе, то з вёскі прыйдзецца ўцякаць.

-- Хлопцы, не на жарты вы разышліся! -- сказаў ён.

Гэты ўрывак узяты з раздзела:

а) “Прапанова Мішкі”;

б) “Нечаканае нападзенне”.

• З двух варыянтаў выберыце патрэбны.

 

Адказы (выкарыстоўвайце толькі для кантролю; словы напісаны наадварот). 1. Еандогаревен. 2. Ацжомареп. 3. Еннездапан еанакачен.

 

Якімовіч, А. М. Белакрылая птушка : аповесці, вершы / Аляксей Якімовіч. – Мінск : Беларусь, 2021. – 199 с.