Праверце сваю логіку і інтуіцыю. “Жылі-былі літары”
Логіка
– уменне разважаць і рабіць вывады.
Сінонімы
да слова “інтуіцыя”: чуццё,
прадбачлівасць, здагадка.
У мінскім выдавецтве “Беларусь” выйшла мая кніга
“Жылі-былі літары (займальныя гісторыі пра літары беларускага алфавіта)”.
1. Урывак з кнігі.
На лясной сцяжынцы сустрэліся рыжы мураш Рыжык і чорны
мураш Чарныш.
Як звычайна бывае, прывіталіся яны. А затым чорны мураш
пачаў расказваць:
-- Паслухай, сусед. Учора я быў у нашага доктара дзятла.
-- Ты захварэў? -- заморгаў вачыма рыжы мураш. Канешне, яму стала шкада Чарныша.
-- Я крыху
захварэў, горлачка мне забалела, -- суцешыў Рыжыка чорны мураш. -- Дык дзяцел
папрасіў, каб я прамовіў...
Чарныш замаўчаў і вінавата паглядзеў на сябра. Ён
забыўся, што ўчора прамовіў у кабінеце доктара.
-- У кабінеце дзятла ты, напэўна, прамовіў
"ах"! -- вырашыў дапамагчы чорнаму мурашу рыжы мураш.
Чарныш адмоўна закруціў галавою.
-- Можа, ты прамовіў "ай-я-яй"?
У гэтым урыўку
расказваецца пра літару:
а) “А”;
б) “Я”.
• З двух варыянтаў выберыце патрэбны.
2. Урывак з кнігі.
Бяжыць па дарозе чорны мураш і працягла вымаўляе:
-- Бэ-э-э... Бэ-э-э... Бэ-э-э... Бэ-э-э...
-- У нас нешта здарылася, Чарныш? -- убачыўшы яго,
пацікавіўся рыжы мураш. Вядома, вельмі здзівіўся ён, бо не чуў, каб так
размаўлялі мурашы.
-- Здарылася! Я навучыўся размаўляць, як баранчык! --
пахваліўся чорны мураш і зноў працягла вымавіў: -- Бэ-э-э...
-- Цікава! -- прагаварыў рыжы мураш.
-- Баранчык разам з мамай сёння на зялёным лузе пасвіўся,
а я непрыкметна падкраўся да іх, вырашыў падзівіцца, -- пачаў расказваць чорны
мураш.
-- Потым мама адышлася ад баранчыка? -- здагадаўся Рыжык.
-- Але, накіравалася да лесу. І тады баранчык гучна
закрычаў: " Бэ-э-э... Бэ-э-э... Бэ-э-э... Бэ-э-э..."
-- Ён паклікаў маму, бо спалохаўся, -- зазначыў рыжы
мураш.
У гэтым урыўку
расказваецца пра літару:
а) “О”;
б) “Б”.
• З двух варыянтаў выберыце патрэбны.
3. Урывак з кнігі.
Сядзіць чорны мураш на пяньку і
дрыжыць, калоціцца:
-- В-в-в, в-в-в, в-в-в...
-- Што здарылася з табою, сусед? --
убачыўшы яго, захваляваўся рыжы мураш.
-- Х-халодная к-кропля в-вады з
г-галінкі на мяне ўпала!.. В-в-в, в-в-в,
в-в-в... -- калоцячыся, паведаміў чорны мураш.
-- Ну і што? -- выцягнуўся твар у
Рыжыка.
-- У-упала і а-абліла м-мяне!..
-- Як жа гэта здарылася?
--
В-варона л-ляцела, крыламі м-махнула, і г-галінка с-страсянулася...
В-в-в, в-в-в, в-в-в...
-- Цяпер табе холадна! -- паспачуваў
Рыжык.
-- М-мне ц-цяпер в-вельмі холадна...
В-в-в, в-в-в, в-в-в...
У гэтым урыўку
расказваецца пра літару:
а) “В”;
б) “Т”.
• З двух варыянтаў выберыце патрэбны.
Адказы (выкарыстоўвайце толькі для кантролю). 1. “А”. 1. “Б”. 3. “В”.
Якімовіч, А. М. Жылі-былі
літары: займальныя гісторыі пра літары беларускага алфавіта / Аляксей Якімовіч.
– Мінск : Беларусь, 2024. – 159 с.
