Можна купіць

 

У лютым 2022 года ў дзяржаўным выдавецтве “Беларусь” выйшла мая кніга “Белакрылая птушка”, якая складаецца з аднайменнай аповесці, фантастычна-дэтэктыўнай аповесці “”Жывое Дрэва” і вершаў. У аповесцях расказваецца пра падлеткаў, якія трапляюць у розныя драматычныя сітуацыі і годна спраўляюцца з імі.

Выданне адрасавана шырокаму колу чытачоў. Кнігу можна заказаць у выдавецтве “Беларусь” у аддзеле маркетынга. Яна каштуе каля 15 рублёў.

Кніга адкрываецца вершам “Успамін” (даецца ў скарачэнні).

                                                               Сонца на усходзе

                                                               Косы распускае,

                                                               Лашчыць маю вёску,

                                                               Ярка асвятляе.

 

                                                               Вёсачка, вёсачка,

                                                               Ты мяне люляла,

                                                               Песні беларускія

                                                               З мамаю спявала.

 

                                                                Помню я бярозкі,

                                                                Што беглі ля дарогі

                                                                І травіцу помню,

                                                                Як лашчыла ногі.

 

                                                                Помню, як чаромха

                                                                Пахам сустракала,

                                                                І зорачку помню,

                                                                Што над вёскай ззяла.

У снежні 2021 года ў дзяржаўным выдавецтве “Беларусь” выйшла мая кніга “Загадкавы храм”, якая складаецца з аднайменнай дэтэктыўнай аповесці, вершаў і прыпевак.

Выданне адрасавана шырокаму колу чытачоў.

Кнігу можна заказаць у гэтым жа выдавецтве ў аддзеле маркетынга. Яна каштуе 13 рублёў 94 капейкі.

Кніга адкрываецца вершам “Беларусы” (даецца ў скарачэнні).

                                                            Завуць нас беларусамі,

                                                            Адметны наш народ.

                                                            Мы на зямлі бацькоўскай

                                                            Жывём не першы год.

 

                                                           У нас свае імёны:

                                                           Алесь, Кастусь, Сымон,

                                                           Змітрок, Міхась, Мікола,

                                                           Пятрусь, Піліп, Антон.

 

                                                           Парася і Аксеня,

                                                           Палуся і Настуся,

                                                           Хрысціна і Маруся,

                                                           Гэля і Таклюся.

 

                                                          І вёскі назву мелі:

                                                          Баравікі, Дуброва,

                                                          Ліпляны, Лістапады,

                                                          Людчыцы, Клянова.

 

                                                           Там ягады збіралі:

                                                           Брусніцы і чарніцы,

                                                           Ажыны, журавіны,

                                                           Дурніцы і суніцы.

 

                                                          Майстроў было нямала:

                                                          Каваль каня каваў,

                                                          Кравец адзенне шыў,

                                                          А дойлід будаваў.

 

                                                          Пралескі нас здзіўлялі,

                                                          Нас чараваў чабор.

                                                          Грыбны лес называлі

                                                          Прыгожым словам бор.

            У ліпені 2021 года ў дзяржаўным выдавецтве “Беларусь” выйшла мая кніга “Карп у футры”, якая складаецца з дэтэктыўных апавяданняў, вершаў і антывірусных прыпевак. 

Кнігу можна заказаць у гэтым жа выдавецтве ў аддзеле маркетынга. Яна каштуе 13 рублёў 54 капейкі.

Яе адкрывае верш “Вядзі, Божа” (даецца ў скарачэнні).

                                                  Вядзі мяне, Божа, да сонца,

                                                  Выводзь мяне з цемры на свет.

                                                  Заўсёды вучы мяне, Божа,

                                                  Любіць не сябе, а Сусвет.

 

                                                  Вядзі мяне, Божа, да мовы,

                                                  Да родных маіх каранёў.

                                                  Дазволь прытуліцца мне, Божа,

                                                  Да мілых, да маміных слоў.

 

                                                  Вядзі мяне, Божа, да працы,

                                                  Да нашай бацькоўскай зямлі.

                                                  Дазволь дакрануцца мне, Божа,

                                                  Да мяккай і цёплай раллі.

 

                                                  Вядзі на Радзіму, у вёску,

                                                  Туды, дзе дзяцінства сляды.

                                                 Няхай над ёй бусел клякоча,

                                                 Няхай расцвітаюць сады.

 

                                                 Дай памяць выдатную, Божа,

                                                 Каб помніў герояў сваіх.

                                                 Я вочы шырока расплюшчу.

                                                 Магчыма, убачу усіх.

У сакавіку 2022 года ў выдавецтве «Беларусь» выйшла мая кніга «Нязваныя госці», якая складаецца, з прыгодніцка-гістарычнай аповесці, мастацкіх гіпотэзаў, вершаў і прыпевак для настрою.

1461 год. На Беларусь рабілі набегі атрады крымскіх татараў. На старонках аповесці «Нязваныя госці» чытачы змогуць пазнаёміцца з хлапчукамі Базылём і Раманам, дзяўчынкай Марысяй, якія трапілі ў палон да татараў. Каб вызваліць дзяцей, падняліся ўсе дарослыя мужчыны з навакольных вёсак.

Мастацкія гіпотэзы «Як узніклі фразеалагізмы» -- новы жанр літаратуры, які не толькі пазнаёміць чытачоў з цікавымі фразеалагізмамі, але і дазволіць ім зазірнуць у мінулае.

Для шырокага кола чытачоў. Яе можна набыць у аддзеле маркетынга выдавецтва «Беларусь». Каштуе каля 15 рублёў.

Кніга адкрываецца вершам «Хвіліна маўчання», які заканчваецца такімі словамі:

Беларусы-ваяры

                                                            Бераглі краіну.

                                                            Ўспомнім прашчураў сваіх,

                                                            Памаўчым хвіліну.