Аўтарскае
слова. Дрынкалаўка
Ёсць так называемыя аўтарскія словы, якія прыдуманы
канкрэтнай асобай, аўтарам. Падобныя словы вырашыў стварыць і я. Адно з іх –
дрынкалаўка (націск падае на першую
літару а).
Як узнікла гэта слова?
Непадалёку ад горада Слоніма ў ваколіцах вёскі Чамяры ў
мяне ёсць дача. Туды звычайна еду на веласіпедзе па асфальтаванай дарожцы,
абсаджанай вялікімі таполямі. Тоўстыя карані таполяў выпучылі, прыўзнялі
асфальт. Ён стаў няроўны. Едзеш па такой дарожцы і падскокваеш. “Еду, быццам
дрынкаю”, -- аднаго разу падумалася мне.
На чым можна дрынкаць?
На струнным інструменце, няўмела іграючы на ім. А яшчэ так нязычліва кажуць пра
таго, чыя размова надакучае, дзейнічае на нервы. Канешне, язда па падобнай
дарожцы таксама дзейнічае на нервы. Вось і з’явілася ў маёй галаве слова “дрынкалаўка”.
Адзначаем! Дрынкалаўка – няроўная
дарога.
Вядзе мяне дрынкалаўка
На
дачу ў Чамяры.
Працую там да поту,
Хоць і
даўно стары.
Аляксей Якімовіч.
1. Якія новыя словы можна скласці з літар, што ўваходзяць
у назоўнік “дарога”?
2. Якія новыя словы можна скласці з літар, што ўваходзяць
у назоўнік “дрынкалаўка”?
Падказка. Ёсць у беларускай мове слова “дрын”. Гэта тоўсты і важкі кій.
3. Падбярыце блізкае па значэнні слова да прыметніка важкі.
4. Закончыце параўнанні.
Дарога хоць … .
Дарога прамая, як … .
5. Закончыце сказ.
6. Брукаваная дарога – гэта дарога, выкладзеная … .
Скорагаворка
Узяў
дрын і пайшоў па дрынкалаўцы.
• Паспрабуйце паўтарыць хутка і
выразна.
Адказы (выкарыстоўвайце толькі для кантролю; словы напісаны наадварот).
1. Гор, рад, араг, адар (адарап). 2. Акўал, кал, аран. 3.
Ікжяц. 4. Ясіцак. 5. Акжутс. 6. Імьнемак.
Хатняе заданне. Паспрабуйце
стварыць сваё аўтарскае слова, якое мае беларускае гучанне.
