Творчы ўрок у 3 класе. ПЫТАЛЬНЫЯ
СКАЗЫ
Мэты: раскрыць вучням
асаблівасці пытальных сказаў; выпрацоўваць уменні і навыкі вызначаць пытальныя сказы, правільна
афармляць іх інтанацыйна, будаваць з дапамогай пытальных слоў; садзейнічаць
развіццю маўлення; пашыраць слоўнікавы запас вучняў; абуджаць у іх цікавасць да
беларускай мовы; вучыць сяброўству, дабрыні.
Ход урока
1. Арганізацыйны этап.
Птушыны, драўляны,
Вясёлы, ганаровы.
Любім, вымаўляем
Нашай мовы словы.
Аляксей Якімовіч.
• Якія беларускія
словы вы ведаеце? Назавіце іх.
2. Праверка дамашняга
задання.
3. Арфаграфічная размінка.
Прачытайце і растлумачце напісанне прапушчаных
арфаграм. Адгадайце загадку.
Пад соснамі,
Пад ёлкамі
Ляжыц.. клубок
З іголкамі. (Вожык.) [2, с. 347, “Беларускія прыказкі…”].
З народнага.
• Растлумачце напісанне прапушчанай арфаграмы.
4. Чыстапісанне.
Ці вялікі вожык? (Вожык невялікі, маленькі).
В в вв
ва вя ві
вож..к воч..
• Растлумачце напісанне прапушчанай арфаграмы.
Прачытайце з патрэбнай інтанацыяй сказ "Ці вялікі вожык?"
5. Паведамленне тэмы і
мэт урока.
Н а с т а ў н і к. Сябры! Вялікая падзея!
Да нас у госці прыйшлі Пытальныя сказы. Разам з імі казка. Шмат цікавага раскажуць яны нам, калі вы
адкажаце на наступныя пытанні герояў казкі:
• Ці хочаце даведацца,
чаму гэтыя сказы называюцца Пытальнымі?
• Ці хочаце навучыцца
правільна чытаць, вымаўляць і будаваць Пытальныя сказы?
Хочаце? Тады паслухайце нашу
казку.
6. Вывучэнне і замацаванне новага матэрыялу.
Чытанне казкі ў спалучэнні з гутаркай і практычнай працай вучняў.
Каб насіць вучэбны дапаможнік па беларускай мове,
які ёй калісьці падарыла Тэма, Сарока набыла прыгожы рознакаляровы партфель.
Прыляцела яна
да Шпачка, каб абновай пахваліцца.
- Добры дзень!
- гучна прывіталася.
А Шпачок
сядзіць на пяньку, галаву ў пер'е схаваў, не адзываецца.
Сарока зняла
партфель са спіны, на відным месцы, каля пянька, паставіла. Няхай бачыць яго
Шпачок.
- Што з табою,
шаноўны? Чаму ты такі
задуменны?
- Эх! - цяжка
ўздыхнуў Шпачок.
"Ён,
мабыць, з суседзямі пасварыўся. Магчыма, з калючым Вожыкам. Магчыма, з
гарэзлівым Зайчыкам. Цяжка яму цяпер. Трэба яго разварушыць, раскатурхаць, каб
выкінуў з галавы благія думкі", - вырашыла Сарока і, дастаўшы з партфеля вучэбны дапаможнік па беларускай мове,
пахвалілася:
- А я нядаўна
вывучыла правіла "Змест і інтанацыя пытальных сказаў". Даволі-такі
цікавае правіла. Ты ведаеш, якія сказы з'яўляюцца пытальнымі?
- Не! - буркнуў Шпачок.
"Яшчэ не
раскатурхала я яго", - падумала Сарока і запыталася:
- А што заключаецца ў пытальных сказах? Як ты
лічыш?
- Раз яны
пытальныя, то лічу, што заключаецца пытанне, - нехаця разважыў Шпачок.
- Разумна
сказана! - пахваліла сябра
Сарока.
Шпачок павесялеў.
- Яшчэ
пытайся. Я пастараюся, адкажу!
Сарока
падскочыла, наблізілася да Шпачка.
- Які знак
прыпынку трэба паставіць у канцы пытальнага сказа? Га?
( На гэтыя пытанні, думаецца, адкажуць вучні,
правераць, ці супадуць іх адказы з адказамі
Шпачка.)
- Раз ён
пытальны, то пытальнік.
- Разумна
сказана! - зноў пахваліла Шпачка Сарока.
Праца са скорагаворкай.
Прачытайце
з патрэбнай інтанацыяй скорагаворку і пастаўце патрэбныя знакі прыпынку ў канцы
сказаў.
Ці
пачаставаў
Саша суніцамі(?)
Саша
пачаставаў
Суніцамі(.)
Аляксей Якімовіч.
• Які з гэтых сказаў выражае паведамленне? У якім
сказе заключаецца пытанне?
• Параўнайце інтанацыю апавядальнага і пытальнага сказа.
У якім сказе тон у канцы паніжаецца,
а ў якім -- павышаецца?
Лінгвістычны каментарый настаўніка.
Ведайце! Пытальныя
сказы часта выкарыстоўваюцца ў тэкстах, якія перадаюць размову розных асоб.
Пісьмо па памяці.
Прачытайце з патрэбнай інтанацыяй. Растлумачце,
які знак прыпынку неабходна паставіць у канцы кожнага сказа. Запішыце па
памяці.
- Я ведаю,
чаму вожыкі калючыя.
- Чаму,
дачушка?
- Яны кактусамі харчуюцца (Аляксей Якімовіч) [4, с. 109, “Каб мама ўсміхалася”].
Выразнае чытанне.
- Прачытайце пытанні
так, каб яны адпавядалі адказам.
- У нашых лясах растуць грыбы?
- Так, у нашых.
- У нашых лясах растуць грыбы?
- Але, растуць.
- У нашых
лясах растуць грыбы?
- Так, грыбы.
Гукавая гульня “Назавіце слова”.
Прачытайце і назавіце патрэбнае слова.
--
Чаму гудзіць вецер?
Чаму свецяць зоркі? --
Спытаўся камарык
Ў
маленькага … (Ягоркі.)
Аляксей Якімовіч.
• Назавіце ў тэксце пытальныя сказы.
Праца са словам.
Н а с т а ў н і к. Пагуляем крыху. Я раздам вам
карткі са словамі, а вы павінны запісаць словы.
1. Назвы месяцаў: студзень...
2. Назвы жывёл: лісіца...
3. Назвы агародніны: цыбуля...
• Складзіце пытальны сказ з адным са слоў.
Фізкультхвілінка.
Настаўнік. Успомнім, як восенню ляцяць сарваныя
ветрам залатыя лісты, як потым падаюць на зямлю, засцілаючы яе незвычайным
дываном. Прывітаўшы, памахаем ім рукою і ўсміхнемся.
Чытанне працягу казкі.
Паслухайце працяг казкі.
- Пытальныя сказы? Пытальныя? - усклікнуў Шпачок і
падняў галаву.
- Што ж цябе
так здзівіла? Ты ўжо не на адно пытанне адказаў! - прамовіла Сарока.
Шпачок
саскочыў з пянька і наблізіўся да суседкі.
- Добра, што
ты нагадала мне пра пытальныя сказы. Я ў цябе хачу запытацца. Што такое
стрыжань?
- Які
стрыжань? Растлумач падрабязней, - не зразумела Сарока.
Шпачок пачухаў
лапкай сваё светлае горлачка.
- Можна і
падрабязней. Братка Салавей мне пісьмо прыслаў. Піша, што купіў новы стрыжань.
Што такое стрыжань?
- Стрыжнем
пішуць. Ён знаходзіцца ў ручцы, - усміхнулася Сарока і дадала: - Сказ "Што
такое стрыжань?" ты ўтварыў пры дапамозе пытальнага слова "што".
-- Першы раз чую пра такое! -- усклікнуў Шпачок.
Сарока адкрыла вучэбны дапаможнік і прачытала
пытальныя словы, з дапамогай якіх утвараюцца пытальныя сказы: ці,
няўжо, хіба, чаму, хто, што, як, дзе.
Праца са слоўнікавым словам.
Назавіце
пытальнае слова ў складзе пытальнага сказа "Што такое чысціня?" Адкажыце на дадзенае пытанне.
Чысціня.
Чысціню.
• Якое слова з двух прапанаваных (захоўваць,
памяшкання) можна падабраць да вышэй дадзеных слоў?
• Растлумачце сэнс выразу "чысціня душы".
• Ці з'яўляюцца роднанымі (аднакаранёвымі) словы
"чысціня" і "чыстацел"?
• Пры напісанні слова "чысціня" ў якім
месцы вас падпільноўвае Памылка Памылкаўна? Чаму?
• Слова "чысціня" перакладзіце на рускую мову. Параўнайце гучанне і напісанне.
Лінгвістычны каментарый настаўніка.
Ведайце! Чысціня --
слоўнікавае слова. Запішыце яго ў слоўнік і выдзеліце арфаграму.
Вясёлая хвілінка.
Н а с т а ў н і к. Вымаўляем правільна. Я прачытаю
верш, а словы гаспадара качанятак – вуць-вуць-вуць – потым перадасце і вы.
Дзе
ж прапалі качаняткі?
Я
паклікаў: -- Вуць-вуць-вуць…
Ў
азярцы былі, пачулі.
Бачу: да мяне плывуць.
Аляксей Якімовіч.
• Цяпер прамовім разам, пакажам, як гаспадар кліча
качанятак: “Вуць-вуць-вуць!”
• Назавіце пытальны сказ у вершаваным тэксце.
Праца з загадкамі.
Запішыце загадкі і адгадкі да іх, назавіце
пытальныя словы ў складзе пытальных сказаў.
Хто не хворы,
а ўсё стогне? (Свіння.)
З народнага.
Што за рэч:
Паглядзіш на яе –
Сябе
ўбачыш. (Люстэрка.)
З народнага.
Што на агні не гарыць,
на
вадзе не тоне? (Слова чалавека.) [2, с. 320, 338, 347, “Беларускія прыказкі…”].
З народнага.
Чытанне працягу казкі ў спалучэнні з гутаркай і практычнай працай вучняў.
Н а с т а ў н і к. Зноў сустрэнемся з Сарокай і
Шпачком.
- Сарока, без
цябе я не зразумеў бы, што такое стрыжань. Ты мне вельмі дапамагла. Ты
сапраўдная сяброўка! -
прамовіў Шпачок і, неспадзявана зачапіўшыся лапкай за партфель, усклікнуў: -
Ого! У цябе новы партфель!
- Табе ён
падабаецца? - пацікавілася Сарока.
- Вельмі
падабаецца!
- У гэтым партфелі, -- сказала Сарока, -- я нашу
кнігу са сваімі любімымі прыказкамі.
-- А што такое прыказкі? – не зразумеў
Шпачок.
-- Народныя выслоўі павучальнага зместу.
- Ты іх на памяць вучыш? -- запытаўся Шпачок.
-- Кожны дзень вучу, -- прызналася Сарока.
-- Прачытай, калі ласка, сваю самую любімую
прыказку, -- папрасіў Шпачок.
Сарока ўзняла галаву і выразна прачытала:
-- Шануй бацьку з мамкаю: другіх не знойдзеш [2,
с. 96, “Беларускія прыказкі”].
• Растлумачце значэнне слова “шануй”. (Беражы.)
• З дапамогай пытальнага сказа пастаўце пытанне да прыказкі.
• Як трэба адносіцца да бацькоў?
Творчая праца.
Выкарыстаўшы
пытальныя сказы, складзіце тэкст на тэму "Мой дом, мая вуліца, мой
горад". Уключыце ў пытальныя сказы пытальныя словы.
План
1. Вуліца, на якой я жыву.
2. Мае суседзі.
3. Мне падабаецца мая вуліца.
Апорныя словы:
называецца, прыгожая, шматпавярховыя, дрэвы, дзіцячая пляцоўка, спартыўная
пляцоўка, гуляюць, ведаю суседзяў,
адпачываюць, люблю вуліцу.
• У слове “горад” напісанне зычнай літары не
адпавядае вымаўленню. Каб праверыць, як патрэбна яе пісаць, звярніцеся да слова
ласкава (утварыце яго памяншальна-ласкальную форму). (Гарадок.)
• Якое правіла вы прымянілі?
Узбагачаем мову словам Якуба Коласа.
Раскрываючы дужкі, запішыце
словы з выбарам літар. Выразна прачытайце вершаваныя радкі Якуба Коласа.
- Ну ж і
балота! Вось атрута,
То не работа
мне -- пакута:
Ступі два
крокі і спыняйся
Ды з гэтай
пырніцай змагайся.
І як яны тут,
ліха долі,
З сахой
ха(дз, д)ілі ў гэтым полі?
Як тут расло,
на мілас(т, ц)ь бога,
Калі ў з(е,
я)млю не ўб'еш нарога? [3, с. 96,
“Новая зямля”].
• Яшчэ раз прачытайце
толькі пытальныя сказы. З дапамогай
якіх слоў яны ўтвораны?
• Раскрыйце сэнс слоў "пырніца" (пырнік, пырэй), "саха" (даўней
сельскагаспадарчая прылада для ворыва
зямлі), "нарог (частка плуга,
якая падразае пласт зямлі з-пад нізу;
лямеш) [1, с. 221, “Тлумачальны
слоўнік”]. Якімі словамі іх можна
замяніць?
Тэсты.
Пытальныя сказы абазначце знакам "+".
1. Колькі табе гадоў
2. Непрыкметна наступіла вясна
3. Як ты правёў канікулы
• З якіх слоў можна скласці пытальны сказ? Абазначце
іх знакам "+".
1. Вы, сюды, прыйшлі, навошта
2. Вёска на, стаіць, беразе, наша, ракі
3. Гісторыю ты сваёй, вёскі, ведаеш
7. Падвядзенне вынікаў урока.
• Якія сказы называюцца
пытальнымі?
• У якіх тэкстах часцей за
ўсё сустракаюцца пытальныя сказы?
• Якая інтанацыя пытальных
сказаў?
• Што ставіцца ў канцы
пытальных сказаў?
• Назавіце словы, з
дапамогай якіх утвараюцца пытальныя сказы.
8. Заданне на дом.
Спіс выкарыстанай літаратуры
1. Баханькоў,
А. Я. Тлумачальны слоўнік беларускай мовы: для сярэдняй школы / А. Я.
Баханькоў, І. М. Гайдукевіч, П. П. Шуба. – 2-е выд., перапрац. і дап. -- Мінск : Нар. асвета, 1972. – 376 с.
2.
Беларускія прыказкі, прымаўкі і загадкі / склад. Яўген Рапановіч. Выд.
другое, перапрац. і дап. – Мінск : Выш.
шк., 1974. – 384 с.
3. Колас, Я. Новая зямля; Сымон-музыка :
паэмы / Якуб Колас. —Мінск : Маст. літ., 1986. — 448 с.
4. Якімовіч,
Аляксей.
Каб мама ўсміхалася : апавяданні, казкі, смяшынкі / А. М. Якімовіч. – Мінск :
Нар. асвета, 2010. – 120 с.
Упершыню надрукаваны ў дадатку да часопіса “Пачатковае навучанне: сям’я,
дзіцячы сад, школа” ў № 20 (2017 год) не ў гэтым, а ў іншым, змененым варыянце.