ВЫВУЧАЕМ
БЕЛАРУСКІ ПРАВАПІС: ПРАКТЫКУМ
Тэма: галосныя і, ы,
зычны й пасля прыставак.
Псіхалагічны настрой.
Узлесак, фарба,
Працавіты, васільковы --
Гэта словы нашай мовы.
Аляксей Якімовіч.
• Якія
словы беларускай мовы вам запомніліся, падабаюцца?
Ствараем
праблемную сітуацыю.
• Як пішам:
імя – безыменны ці безіменны?
Што трэба ведаць, каб адказаць на гэта пытанне?
Хвілінка
кемлівасці.
Чытаем правіла.
Запомніце! Пасля прыставак на зычны гук у адпаведнасці з вымаўленнем на месцы
ненаціскнога і пішацца ы [3, стар. 132, “Беларуская мова”].
Напрыклад: ісці
– адысці.
Прыстаўка ад- у слове “адысці” канчаецца на
зычны гук [д]. Значыць, пасля гэтай
прыстаўкі пішацца літара ы.
Вырашэнне праблемнай
сітуацыі.
Пішам: безыменны.
Назавіце
слова.
Пішам без памылак
Да
гары падышлі,
На гару ўзышлі,
З гары … (сышлі).
Аляксей Якімовіч.
• Растлумачце правапіс літары ы пасля прыставак у словах
вершаванага тэксту.
Адзначаем! Галосны ы з’яўляецца пасля прыставак на зычны гук, калі яны спалучаюцца
з коранем –ход -: узыходзіць [3, стар. 132, “Беларуская
мова”].
Праца са сказам.
Складзіце скорагаворку са слоў.
Людзі, любяць, многія, надыходзіць, калі, зіма. (Многія людзі любяць, калі зіма надыходзіць.)
• Растлумачце
правапіс выдзеленай літары.
Адзначаем! У дзеяслоўных формах з каранямі іс- (-ід), ход-
(-іш)
пасля ы не рэкамендуецца пісаць й (абыду) [3, стар. 132, “Беларуская мова”].
Скорагаворка.
Марозы надышлі, але нас абышлі (Аляксей Якімовіч).
• Якая
арфаграма паўтараецца ў словах скорагаворкі?
Ствараем
праблемную сітуацыю.
• Як пішам:
інстытут – міжінстытуцкі ці міжынстытуцкі?
Што трэба ведаць, каб адказаць на гэта пытанне?
Хвілінка
кемлівасці.
Звяртаемся да правіла.
Запомніце! Пасля марфем (прыставак) між-, звыш-, пан-,
суб-,
супер-, транс-,
гіпер-,
контр-
ненаціскны і захоўваецца [3, стар. 132, “Беларуская мова”].
Вырашэнне праблемнай
сітуацыі.
Пішам: міжінстытуцкі.
Назавіце
слова.
Звышімгненны,
Звышімклівы,
Цячэ дожджык
У … (адлівы).
Аляксей Якімовіч.
• Растлумачце правапіс літары і ў словах вершаванага тэксту “звышімгненны”,
“звышімклівы”.
Адзначаем! Пры далучэнні прыстаўкі на галосны гук прыстаўное і можа выпадаць [3, стар.
132, “Беларуская мова”].
Магчымыя варыянты напісання: імчацца -- паімчацца – памчацца.
Скорагаворка.
Іржавела,
іржавела, але не заржавела (Аляксей
Якімовіч).
• Назавіце
арфаграму на вывучанае правіла.
Ствараем
праблемную сітуацыю.
• Як пішам:
ісці – зайсці ці заісці?
Што трэба ведаць, каб адказаць на гэта пытанне?
Хвілінка
кемлівасці.
Знаёмімся з правілам.
Запомніце! Пасля прыставак на галосны гук у адпаведнасці з вымаўленнем на месцы і
пішацца й [3, стар. 132, “Беларуская мова”].
Напрыклад: інакш
– перайначыць.
Прыстаўка за- ў слове “зайсці” заканчваецца на
галосны гук [а]. Значыць, пасля гэтай
прыстаўкі пішацца літара й.
Вырашэнне праблемнай
сітуацыі.
Пішам: зайсці.
Назавіце
слова.
Пішам з й
З дому выйшаў,
Па вуліцы пайшоў
І да сябра … (прыйшоў).
Аляксей Якімовіч.
• Растлумачце правапіс літары й у словах вершаванага тэксту.
Адзначаем! Каранёвая літара і захоўваецца на пісьме, калі яна
ўтварае склад: за-і-ка [5, стар. 49,
“Беларуская мова”].
[6, “Беларуская
мова”]
Назавіце
слова.
Пішам з і
Заіскрыцца,
Заіленне,
… (Заіліцца).
Аляксей Якімовіч.
• Растлумачце правапіс літары і ў словах вершаванага тэксту.
Для
даведкі: іл – вязкі асадак з арганічных або
мінеральных рэчываў на дне вадаёмаў, балот; твань [1, стар. 134, “Тлумачальны
слоўнік”].
Фізкультхвілінка.
На столі, на сцяне вачыма намалюйце прыгожыя літары і,
ы,
й,
потым напішыце беларускае слова “сыходзіцца” і лагодна ўсміхніцеся, прывітайце
яго, добрае і ласкавае.
Праца з вершам.
Складзіце разбураны нядобрым чараўніком верш Аляксея
Якімовіча.
Хутка прабягае,
Нам не спагадае.
Разыграцца не дае ён,
Дзень кароценькі зімою,
Адказ: 1 – 4, 2 – 1, 3 – 3, 4 – 2.
• Знайдзіце
ў вершаваным тэксце дзеяслоў з прыстаўкай. Растлумачце яго напісанне.
• Якім
словам можна замяніць слова “разыграцца”? (Разгуляцца.)
Працуем са спалучэннямі слоў.
• Са
словамі “сыграць”, “абымшэлы” прыдумайце спалучэнні слоў з прамым і з
пераносным значэннем.
• Ці
з’яўляюцца гэтыя спалучэнні слоў словазлучэннямі?
• Што вам
вядома пра напісанне слоў “сыграць”, “абымшэлы”?
Для даведкі: сыграць на скрыпцы – сыграць на нервах, абымшэлы пень – абымшэлая
ідэя.
Сустрэча з
фразеалагізмамі.
Назавіце фразеалагізмы ў вершах Аляксея Якімовіча, якія
абазначаюць “абразіць, зняважыць,
прынізіць” і “зусім нямнога часу да канца чагосьці (засталося)”.
Нядобры наш Міколка:
Любіць аб..лгаць,
Уволю насмяяцца,
… … … .
Сонейка нясмела
Свеціць з вышыні.
Ад..ходзіць лета,
Засталіся … … .
• Устаўце
прапушчаныя літары.
Для даведкі: абылгаць.
Словы
фразеалагізма, напісаныя наадварот: з юёзарг ьцашямз;
яыначіл інд [2, стар. 127, 167, “Фразеалагічны слоўнік”].
Узбагачаем мову словам Якуба
Коласа.
Раскрываючы дужкі, запішыце словы з выбарам літар.
Выразна прачытайце вершаваныя радкі Якуба Коласа.
Я развітаюся
з Сымонам –
Тут круг
замкнут а(д, дз)ін, а там
Сваім
звычайным ходам-гонам
Пачнуцца
новыя кругі –
Яшчэ далёкі
берагі,
Аб іх
раскажа повесць вам
Ужо не я, а
хто другі.
Пайшоў Сымон
сваёй пуцінай,
Бо ён прыроджаны п(я, е)сняр [4, стар. 447,
“Паэмы Я. Коласа”].
• Падбярыце літаратурныя
адпаведнікі да аўтарскіх слоў “круг”, “повесць”, “пуцінай”. (Кола,
аповесць, шляхам.)
• Растлумачце правапіс слова
“пайшоў”.
Адказы
на пытанні.
• Калі пасля прыставак захоўваецца каранёвае і?
• Калі на
месцы каранёвага і пасля прыставак пішацца ы?
• Калі
пасля прыставак на месцы і пішацца й?
Тэст.
• Назавіце
словы, у якіх пасля прыставак пішацца і.
1. Між..нстытуцкі.
2. Аб..ходзіць.
3. За..нелы.
4. За..нтрыгаваць.
5. За..грываць.
6. За..кастасць.
7. Без..ніцыятыўны.
Адказ: 1, 3, 4, 5, 6.
Выкарыстаная
літаратура
1. Баханькоў,
А. Я. Тлумачальны слоўнік беларускай мовы: для сярэдняй школы / А. Я.
Баханькоў, І. М. Гайдукевіч, П. П. Шуба. – 2-е выд., перапрац. і дап. -- Мінск : Нар. асвета, 1972. – 376 с.
2. Гаўрош,
Н. В і інш. Фразеалагічны слоўнік. Для сярэд. школы. Пад рэд. доктара
філалагічных навук Ф. М. Янкоўскага. –
Мн., “Нар. асвета”, 1973. – 352 с.
Перад загал. аўт. : Н. В.
Гаўрош, І. Я. Лепешаў, Ф. М. Янкоўскі.
3. Гваздовіч, Г. А. і інш.
Беларуская мова : Падруч. для 10-га кл. устаноў, якія забяспечваюць атрыманне
агул. сярэд. адукацыі з бел. мовай навучання з 11-гадовым тжэрмінам навучання /
Г. А. Гваздовіч, М. М. Круталевіч, У. П. Саўко. – 2-е выд., дапрац. – Мн. :
Нар. асвета, 2004. – 239 с.
4. Колас, Я.
Новая зямля; Сымон-музыка : паэмы / Я. Колас. —Мінск : Маст. літ., 1986. — 448
с.
5. Беларуская мова : вучэб. дапам. для 6-га кл. устаноў
агул. сярэд. адук. з беларус. і рус. мовамі навучання : у 2 ч. / Г. М. Валочка [і
інш]. – Мінск : Нац. ін-т адукацыі, 2020. --
240 с.
6. Беларуская мова : вучэб. дапам. для 10-га кл. устаноў
агул. сярэд. адук. з беларус. і рус. мовамі навучання : у 2 ч. / Г. М. Валочка [і
інш]. – Мінск : Нац. ін-т адукацыі, 2020. – 232 с.
Гэты ўрок (у ім
могуць быць некаторыя змяненні) надрукаваны ў часопісе “Беларуская мова і
літаратура”, люты 2021 года, № 2.