Творчы ўрок у 3 класе. ЗМЯНЕННЕ
ДЗЕЯСЛОВАЎ ПРОШЛАГА ЧАСУ ПА РОДАХ І ЛІКАХ
Мэты: пазнаёміць са
змяненнем дзеясловаў прошлага часу па родах і ліках; фарміраваць уменні і
навыкі вызначаць род і лік дзеясловаў прошлага часу; садзейнічаць развіццю
маўлення; пашыраць слоўнікавы запас вучняў; абуджаць у іх цікавасць да
беларускай мовы; выхоўваць павагу да старэйшых, да маці.
Ход урока
1. Арганізацыйны момант.
Паўтарыце з рознай інтанацыяй.
(Ціха.) Добра вучыць паслухмянага!
(Мацней.) Добра вучыць паслухмянага!
(Моцна.) Добра вучыць паслухмянага! [2, с. 176, “Беларускія
прыказкі…”].
Слухайце ўважліва, будзьце паслухмяныя.
2. Праверка дамашняга
задання.
3.
Арфаграфічная размінка.
Прачытайце і ўстаўце прапушчаныя арфаграмы. Растлумачце іх напісанне.
Галубачка белая
Ў хату зал..цела.
А дзе і што сустракала,
Пра ўсё ра..казала. (Ліст, газета.) [2, с. 367, “Беларускія прыказкі…”].
З народнага.
• Вызначце ў словах прыстаўкі.
4.
Чыстапісанне.
Літару, якую мы будзем пісаць на хвілінцы
чыстапісання, вы вызначыце, калі знойдзеце заканамернасць падбору літар у
групах:
а в ж і к м
б з ?
• Якую бачыце
заканамернасць? Якую літару будзем пісаць? (л). (Заканамернасць:
літара, якая знаходзіцца ўнізе, стаіць у алфавіце паміж дзвюма верхнімі.)
• Напішыце радок літар,
які складаецца з некалькіх пар літар. У кожную пару павінны ўваходзіць літара л і
тыя літары, якія знаходзяцца ў вышэй напісаных еняах згодна з алфавітным
парадкам.
Л ла
лб лв лж
лз лі лк лл
лм
- Запішыце
скорагаворку, якая не атрымалася б без літары л.
Ляснік
Лёня спыніўся каля лаўкі (Аляксей Якімовіч.)
• Вызначце часціны мовы ў скорагаворцы.
5. Паведамленне тэмы і
мэт урока.
Н а с т а ў н і к. У краіне Мовазнавіі ёсць
часціна мовы, якая сама гаворыць пра сябе. Яна можа паведаміць пра дзеянне
(іду), падзяліцца бядою (перажываю) і радасцю (весялюся), суцешыць (супакойся).
Як вы ўжо здагадаліся, называецца яна…
Так, дзеяслоў.
еня дзеясловы прошлага часу
раскажуць вам, як змяняюцца па родах і ліках.
А дапамогуць ім у гэтым
добрыя казачныя героі.
6. Вывучэнне і замацаванне новага матэрыялу.
Чытанне казкі.
Аднаго разу ў госці да Сарокі адправіліся Пеўнік і
Курачка. Доўга яны ішлі. Стамілася Курачка, пачала скардзіцца:
- Ідзём,
ідзём, а ніяк не дойдзем. Мне здаецца, што гэтая дарога бясконцая.
- Пацярпі, - папрасіў сяброўку Пеўнік. - Як-небудзь дойдзем.
Пайшлі далей.
За павароткай дарогі ўбачылі на пяньку
ліст паперы, спісаны літарамі.
Цікаўны Пеўнік узяў яго і паказаў Курачцы.
- Во што мы
знайшлі!
- Каб рысавае
зярнятка! – расчаравана прагаварыла Курачка.
- У гасцях
пачастуемся зярняткамі, - прамовіў Пеўнік і, адзеўшы акуляры, прачытаў на
лістку: - Змяненне дзеясловаў
прошлага часу па родах і ліках.
Зацікавіўшыся,
Курачка прыўстала на лапках і паўзіралася.
- Тут нейкія заданні!
- Нялёгкія заданні! -
страсянуў чырвоным грэбенем Пеўнік. – Каб выканаць іх, трэба добра паразважаць.
Вось якія заданні ўбачылі
на лістку Курачка і Пеўнік:
Дзеясловы прошлага часу называюць дзеянні, якія …, і адказваюць на пытанні… .
Выразы для даведкі: што рабіў? (што зрабіў?),
што рабіла? (што зрабіла?), што рабілі?
(што зрабілі?); ужо адбыліся.
Дзеясловы прошлага часу змяняюцца
адз. лік мн. лік
агеньчык
свяціў (м.р.) агеньчыкі свяцілі
лямпачка
свяціла (ж. р.)
сонца свяціла (н. р.)
• Што называюць дзеясловы прошлага часу?
• Як змяняюцца дзеясловы прошлага часу?
1. Прыклады дзеясловаў прошлага часу ў адзіночным ліку:
2. Прыклады
дзеясловаў прошлага часу ў
множным ліку:
Адказ на пытанне.
Пакуль Курачка і Пеўнік разважаюць, адкажыце на пытанне, выкарыстаўшы заданне з казкі:
Што называюць дзеясловы прошлага часу?
• Вызначце час дзеяслова “звінелі”.
• Пры напісанні слова “звінець” у якім месцы вас падпільноўвае Памылка Памылкаўна? Чаму?
• Перакладзіце на рускую мову слова “звінець”.
Параўнайце гучанне і напісанне.
• Складзіце і запішыце сказ са словам “звінець”.
Лінгвістычны каментарый настаўніка.
Ведайце! Звінець –
слоўнікавае слова. Запомніце, як яно пішацца.
Праца з тэкстам.
Прачытайце. Знайдзіце ў тэксце дзеясловы прошлага
часу. Выпішыце іх. Пастаўце пытанні да дзеясловаў.
Узор. (Што зрабіў?)
прыйшоў.
Дзень быў
святы. Яшчэ ад рання
Блінцы
пякліся на сняданне,
І ўжо пры
печы з чапялою
Стаяла
маці… Пад рукою
Таўкліся
дзеці, заміналі,
Або
смяяліся, спявалі.
Якуб Колас [4, с. 9, “Новая зямля”].
• Вызначце значэнне слова “чапяла”. (Прыстасаванне, з дапамогай якога даставалі з
печы патэльні, чыгуны.)
• Падбярыце сінонім да слова “замінаць”. (Перашкаджаць.)
• Як вы адносіцеся да старэйшых, да маці?
Гутарка.
Адкажыце на пытанне, выкарыстаўшы заданне з казкі.
• Як змяняюцца дзеясловы прошлага часу?
• Выканайце першыя два пункты задання Курачкі і
Пеўніка, запішыце дзеясловы прошлага часу ў адзіночным і множным ліку.
Праца з вершаваным тэкстам.
Прачытайце. Вусна пастаўце пытанні да дзеясловаў.
Запішыце дзеясловы, як паказвае ўзор.
Узор. Працаваў -
працавала – працавалі; працавалі – працавала – працаваў.
Зіма
Надышлі марозы,
Рэчкі закавалі,
Белыя бярозы
Шэранем убралі.
Замялі дарогі
Ветрыкі снягамі.
Лес, як дзед убогі
З доўгімі вусамі,
Апусціў галіны
І стаіць журботна,
Зрэдку верхавіны
Зашумяць маркотна.
Якуб Колас [6, с. 60, “Раніца
ў нядзельку”].
• Растлумачце значэнне слова “ўбогі”. (1) бедны,
няшчасны. 2) Варты жалю.) [1, с. 333,
“Тлумачальны слоўнік”].
• Назавіце сінонімы ў вершы. (Журботна, маркотна.)
Падбярыце да іх яшчэ адзін сінонім. (Сумна.)
Н а с т а ў н і к.
Паслухайце працяг казкі і праверце, ці правільна адказалі вы на пытанні.
Чытанне працягу казкі.
- А я ўжо зразумеў! - паразважаўшы над заданнем,
прамовіў Пеўнік.
Курачка падняла галаву.
- Цікава было б паслухаць, што ты зразумеў.
- Дзеясловы прошлага часу называюць дзеянні, якія ўжо адбыліся. Яны адказваюць на
пытанні што рабіў? (што зрабіў?), што рабіла? (што зрабіла?),
што рабілі? (што зрабілі?).
- Я таксама
нешта зразумела, - перапыніла Пеўніка Курачка. І ёй захацелася паказаць свае веды. - Дзеясловы прошлага часу змяняюцца па ліках, а ў
адзіночным ліку - па родах.
- Так, -- пагадзіўся Пеўнік і дадаў: -- А па
асобах яны не змяняюцца.
-- А я магу змяніць дзеясловы прошлага часу і па
асобах! -- заявіла Курачка. Вось паслухай: я пісала, ты пісала, яна пісала.
-- Ты толькі мяняеш займеннікі 1-й, 2-й і 3-й асобы,
дапісваючы іх да дзеяслова. Пры кожным з гэтых займеннікаў дзеяслоў мае адзін і
той жа канчатак. Значыць, сам дзеяслоў прошлага часу па асобах не змяняецца, -
сказаў Пеўнік.
Лінгвістычны каментарый настаўніка.
Запомніце! Дзеясловы
прошлага часу па асобах не змяняюцца.
Вясёлая хвілінка.
Вымаўляем
правільна. Я прачытаю верш, а
словы – люлі-люлі, люлі – потым прамовіце і вы.
Коцік Рыжык
Прылёг каля дзядулі,
На вуха напявае:
“Люлі-люлі-люлі”.
Аляксей Якімовіч.
• Пакажам, як напявае коцік, прамовім разам:
“Люлі-люлі-люлі!”
• Дзеяслоў спявае
пастаўце ў прошлым часе і ахарактарызуйце яго, выкарыстаўшы запіску-заданне
Курачкі і Пеўніка.
Н а с т а ў н і к. Зноў запрашаю на вас на
сустрэчу з Курачкай і Пеўнікам.
Чытанне працягу казкі ў спалучэнні з гутаркай і практычнай працай вучняў.
- Хацелася б
мне ведаць, хто пакінуў тут гэта
заданне! - у задуменні
прагаварыў Пеўнік.
- Сарока
пакінула. Каб не засумавалі мы ў дарозе, - здагадалася Курачка.
- Я іду, -
сказаў Пеўнік і ўсміхнуўся.
- Мы ідзём! -
падхапіла Курачка і пакрочыла па дарозе, заспяваўшы:
Сарока паспрыяла,
Заданне нам дала.
Хацелася б мне ведаць,
Дзе яго ўзяла.
• Назавіце ў казцы дзеясловы прошлага часу. Вызначце
іх род і лік. Якая часціна мовы дапамагла вам гэта зрабіць?
Лінгвістычны каментарый настаўніка.
Ведайце! Каб
вызначыць род і лік дзеяслова прошлага часу, трэба вызначыць род і лік
назоўніка ці займенніка, з якім звязаны гэты дзеяслоў. Яны маюць адзін і той жа
род і лік.
Самастойная праца.
Прачытайце верш. Выпішыце дзеясловы множнага ліку. Што яны абазначаюць? Пастаўце
іх у адзіночным ліку.
Між алешын, кустоў,
Дзе пяе салавей,
І шуміць і грыміць
Срэбразвонны ручэй.
Як матулька, вярба
Хіліць голаў над ім,
І глядзяцца кусты
Пышным верхам
сваім.
Абступаюць яго
Чараты, асака,
Падыходзіць мурог
Да яго
здаляка.
Якуб Колас [6, с. 129, “Раніца ў
нядзельку”, “Ручэй”].
• Падбярыце літаратурныя адпаведнікі да аўтарскіх
слоў “голаў” (галаву), “здаляка” (здалёку), “чараты” (чарот).
• Растлумачце значэнне слова “мурог”. (Сухадольная
трава высокай кармавой якасці , а таксама сена з гэтай травы.) [1, с.
216, “Тлумачальны слоўнік”].
• Дзеясловы цяперашняга часу замяніце дзеясловамі
прошлага часу.
Гульня "Крок уперад".
Удзельнікі становяцца ў дзве шарэнгі, выбіраюць
капітанаў. Вядучы называе дзеяслоў
у форме прошлага часу адзіночнага ліку. Капітан у адказ называе дзеяслоў у форме прошлага часу множнага ліку, напрыклад: касіў -
касілі; малаціў - малацілі; дзейнічаў - дзейнічалі; спаў - спалі - і робіць разам са сваёй
шарэнгай крок уперад.
Гукавая гульня "Назавіце слова".
Прачытайце верш і назавіце патрэбнае слова.
Каля хаты пад акном
Ружы пасадзіла.
“Малайчына, Ніначка!” --
Мама … (пахваліла).
Аляксей Якімовіч.
• Вучань сцвярджае, што ў тэксце а) ёсць дзеяслоў
прошлага часу, б) няма дзеяслова прошлага часу. З якім меркаваннем вы згодны?
Фізкультхвілінка.
Уявіце, што вы садзіце куст руж, пакажыце, як вашы
пальчыкі бяруць яго, каб не пакалоцца, як садзяць, як потым льецца вадзічка,
калі паліваеце.
Праца з табліцай.
Разгледзьце табліцу "Канчаткі
дзеясловаў". Запомніце канчаткі дзеясловаў прошлага часу ў адзіночным і
множным ліку.
Канчаткі дзеясловаў
---------------------------------------------------------------------------------------------------
Адзіночны лік
Мужчынскі род Ён ішоў□, маляваў□, наведаў□
Жаночы род Яна ішла, малявала, наведала
Ніякі род Яно ішло, малявала, наведала
Множны
лік
Яны ішлі, малявалі, наведалі.
---------------------------------------------------------------------------------------------------
Чытанне працягу казкі ў спалучэнні з гутаркай і практычнай працай вучняў.
Н а с т а ў н і к. Паслухайце працяг казкі.
У дажджлівы
асенні дзень у госці да Пеўня і Курачкі завітала Сарока.
- Як жывецца вам, шаноўныя? - з парога
запыталася.
- Ой, сумна
мне! Ой, нудна мне! - пачала ўздыхаць Курачка.
- Бяда! Бяда!
- пляснуў крыламі Певень. - Увесь дзень
сумуе. Не ведаю, як дапамагчы ёй.
- Я ведаю, што
зрабіць, каб не было сумна і табе, і тваёй Курачцы, - сказала Сарока.
- Дапамажы!
Век буду дзякаваць! - з радасці пракукарэкаў Певень.
Сарока
наблізілася да Курачкі.
- Курачка, ты
калісьці ў школу хадзіла.
Курачка важна
кіўнула рабенькаю галавою.
- Хадзіла, на
выдатна вучылася.
- І тэму
"Дзеяслоў" на выдатна вывучыла?
- Але. Я, як
ты ведаеш, самая разумная Курачка.
- Я гэта зараз
праверу. Ты не супраць? - пацікавілася Сарока.
- Калі ласка,
- дазволіла Курачка.
Сарока дастала
з партфеля аркуш паперы з тэкстам "Сонца прачнулася" і паказала яго Курачцы.
- Як ты лічыш:
тут усё правільна напісана?
- У гэты цёплы летні дзень сонца прачнуўся рана,
нават раней, чым птушкі. Яно ўзышоў на неба і накіраваў свае праменьчыкі на
раку, з якой даўно сябраваў, -- прачытала Курачка і ўсклікнула: -- Няправільна!
Курачка сапраўды была вялікай разумніцай.
Яна хутка выправіла ў тэксце памылкі, узрадавалася і перастала сумаваць.
• Якія памылкі выправіла Курачка? Як вы лічыце?
Граматычная праца.
Прачытайце. Знайдзіце ў тэксце дзеясловы
прошлага часу. Выпішыце іх разам з тымі словамі, да якіх яны адносяцца.
Пастаўце пытанні да дзеясловаў, абазначце іх канчаткі.
Узор. Алесь (што зрабіў?) вывучыў.
На балоцістым лузе каля рэчкі жаласна крычаць
кнігаўкі. Прыляцелі яны рана, разам з жаваранкамі і шпакамі. Жывуць кнігаўкі
каля вады, кормяцца чарвякамі, лічынкамі, слімакамі. У пачатку красавіка
кнігаўкі выкапалі на лузе каля рэчкі невялікую ямку, і самка паклала туды
чатыры зеленаватыя яйкі. Праз шаснаццаць дзён з яек выйшлі птушаняты (Віталь Вольскі, “Май”.) [3, с. 36,
“Месяц за месяцам”, “Май”].
Рэдагаванне тэксту.
Пастаўце дзеясловы ў тэксце “Стройная бярозка” ў
правільнай форме і запішыце.
На ўзлеску рос беластволая бярозка. Яе доўгія
тонкія галінкі цягнулася ўгору. Маленькія зялёныя лісточкі пакрывала бярозку.
На галінках часта сядзела і шчабятала птушкі.
Праца з практыкаваннем.
Устаўце дзеясловы прошлага часу адзіночнага ліку, якія "згубіў"
аўтар.
Перад намі сцяной … спелае жыта. З самага ранку ў полі … магутныя камбайны.
У садах галінкі аж … ад яблыкаў.
Сёлетняя восень … людзей добрым
ураджаем.
Словы для даведкі: парадавала, працавалі, стаяла, гнуліся.
Узбагачаем мову словам Якуба Коласа.
Раскрываючы дужкі, запішыце словы з
выбарам літар. Выразна прачытайце вершаваныя радкі Якуба Коласа.
Непрыветна
цераз вокны
Ночка пазірае.
Ціха ў хаце.
Ўся с(е, я)мейка
Спіць, а(д, т) пачывае.
Натрудзіўшы
добра рукі,
Натамі(у, ў)шы плечы,
Толькі маці з
в(я, е)раценцам
Туліцца пры печы [5, с. 61, “З майго летапісу”].
• Замяніце дзеясловы цяперашняга часу дзеясловамі
прошлага часу.
• Растлумачце значэнне
слова "туліцца" (тут знаходзіцца, знайшла сабе
прытулак).
• Як вы адносіцеся да
сваёй маці? Ці дапамагаеце ёй? Ці ўсё робіце, каб яна была шчаслівая?
7. Падвядзенне вынікаў урока.
• Што называюць дзеясловы прошлага часу? На якія
пытанні яны адказваюць?
• Як змяняюцца дзеясловы прошлага часу?
• Як вызначаецца род дзеясловаў у форме прошлага
часу?
Тэсты.
У кожным радзе падкрэсліце "лішні"
дзеяслоў.:
1) працую; 2) танцавалі; 3) пазяхалі.
1) ляжаў; 2) адпачываў; 3) адпачывае.
1) выступаў; 2) ішоў; 3) спявае.
8. Заданне на дом.
Спіс выкарыстанай літаратуры
1. Баханькоў,
А. Я. Тлумачальны слоўнік беларускай мовы: для сярэдняй школы / А. Я.
Баханькоў, І. М. Гайдукевіч, П. П. Шуба. – 2-е выд., перапрац. і дап. -- Мінск : Нар. асвета, 1972. – 376 с.
2.
Беларускія прыказкі, прымаўкі і загадкі / склад. Яўген Рапановіч. Выд.
другое, перапрац. і дап. – Мінск : Выш.
шк., 1974. – 384 с.
3. Вольскі,
В. Месяц за месяцам : / Віталь Вольскі. – Мінск : Нар. асвета,
1979. -- 159 с.
4. Колас, Я. Новая зямля; Сымон-музыка :
паэмы / Якуб Колас. —Мінск : Маст. літ., 1986. — 448 с.
5. Колас,
Я. З майго летапісу : выбр. вершы /
Якуб Колас. — Мінск : Беларусь, 1967. — 308 с.
6. Колас, Я. Раніца ў нядзельку : вершы,
апавяданні, казкі / Якуб Колас. —Мінск : Беларусь, 1969. — 224 с.
Упершыню надрукаваны ў дадатку да часопіса “Пачатковае навучанне: сям’я,
дзіцячы сад, школа” ў № 19 (2017 год) не ў гэтым, а ў іншым, змененым варыянце.