Сябруе са старэйшымі
Сымон.
-- Мой унук сябруе са старэйшымі
хлопцамі, што мяне вельмі непакоіць. Яны
старэйшыя за яго на тры – чатыры гады. Цяпер яму дзесяць, а ім чатырнаццаць.
Праз два гады будзе дванаццаць і адпаведна шаснаццаць.
Ці нармальна гэта? Як вы лічыце?
• Як Вы, нашы эксперты, ацэньваеце гэту сітуацыю?
• Што зрабілі б у дадзеным выпадку?
Эксперт Мікола.
-- Дзядулю Сымону я параіў бы бліжэй
пазнаёміцца з гэтымі хлопцамі, каб ведаць, якія яны, чым дыхаюць, якое
ўздзеянне могуць аказаць на ўнука. Няхай паназірае за імі і распытаецца ў тых
людзей, якія іх ведаюць.
Эксперт Ніна.
-- Унуку Сымона, думаю, не хапае
мужчынскага цяпла. Вось і цягнецца ён да старэйшых. Гэту сітуацыю нейкім чынам
трэба выправіць.
Эксперт Таня.
-- Трэба, каб дзядуля Сымон больш увагі
ўдзяляў свайму ўнуку. Яму трэба часцей быць з ім, вучыць яго, каб перадаць, як
спадчыну, нейкія свае навыкі і ўменні. Няхай хлапчук павучыцца кіраваць
аўтамабілем, няхай разам з дзедам ходзіць на рыбалку, разам працуе на агародзе,
разам нешта майструе. Зацікаўце свайго ўнука сваімі справамі, дзядуля Сымон.
Эксперт Стась.
-- Лічу, што ўнук Сымона ў кампаніі
старэйшых шукае нейкую абарону. Можа, аднакласнікі яго неўзлюбілі і цкуюць.
Ці знойдзе там абарону, падтрымку, ці не
сапсуецца змалку? Гэта ўжо залежыць і ад яго самога. Вуліца – своеасаблівае
жыццёвае перакрыжаванне: направа пойдзеш – узмужнееш, шчасце знойдзеш, а
налева… На той дарожцы могуць чакаць розныя спакусы, многія з якіх нядобрыя.
Сачыце за сваім унукам, дзед Сымон!
• А як да гэтай сітуацыі адносіцеся Вы, нашы чытачы?
