ВЫВУЧАЕМ
БЕЛАРУСКІ ПРАВАПІС: ПРАКТЫКУМ
Тэма: Асаблівасці правапісу
канчаткаў назоўнікаў другога скланення ў адзіночным ліку.
Псіхалагічны настрой.
Хатка,
лужынка,
Люстэрка, вераснёвы --
Гэта словы нашай мовы.
Аляксей Якімовіч.
• Якія
словы беларускай мовы вам запомніліся, падабаюцца?
Успомнім! Да другога скланення адносяцца назоўнікі мужчынскага роду з нулявым
канчаткам у назоўным склоне і назоўнікі ніякага роду з канчаткамі –о,
-ё,
-е,
-а
[6, стар. 166, “Беларуская мова”].
Напрыклад: снег, шчасце.
Ствараем праблемную сітуацыю.
• Як пішам: лёду ці лёда, клею
ці клея? (1)
• Як пішам: цукру ці цукра, гаю
ці гая?
(2)
• Як пішам: ветру ці ветра, ценю ці ценя? (3)
• Як пішам: шляху ці шляха, краю
ці края? (4)
• Як пішам: абавязку ці абавязка, гневу
ці гнева? (5)
• Як пішам: грыпу
ці грыпа, коклюшу ці коклюша? (6)
• Як пішам: поспеху
ці поспеха, клімату ці клімата? (7)
• Як пішам: кірмашу
ці кірмаша, форуму ці форума?
(8)
Што трэба ведаць, каб адказаць на гэта пытанне?
Хвілінка
кемлівасці.
Пачнём з правіла.
Запомніце! Большасць назоўнікаў другога скланення мужчынскага роду, у тым ліку
ўсе асабовыя, у родным склоне адзіночнага ліку маюць канчаткі –а
(-я):
Васіля,
каменя, стала.
Канчаткі –у (-ю) маюць назоўнікі, якія
абазначаюць:
1) уласцівасці, дзеянні, пачуцці: абавязку, гневу.
2) прасторавыя і часаввыя паняцці: шляху, краю,
веку.
3) з’явы прыроды: ветру, ценю.
4) зборныя прадметы: цукру, гаю. Але: аўса, хлеба.
5) матэрыялы і рэчывы, з якіх складаюцца прадметы: лёду,
клею.
6) захворванні: грыпу, коклюшу.
7) абстрактныя паняцці: поспеху, клімату.
8) падзеі ў грамадскім жыцці: кірмашу, форуму [4, стар. 97, “Беларуская мова”].
• Дапоўніце
гэтыя азначэнні адпаведнымі прыкладамі з задання “Ствараем праблемную
сітуацыю”.
[3, стар. 232, “Беларуская
мова”]
Працуем са спалучэннямі слоў.
• Са словам
“грузу” прыдумайце спалучэнні слоў з прамым і з пераносным значэннем.
• Ці
з’яўляюцца гэтыя спалучэнні слоў словазлучэннямі?
• Што вам
вядома пра напісанне слова “грузу”?
Для даведкі: цяжкага грузу – грузу праблем.
Адзначаем! Некаторыя назоўнікі мужчынскага роду ў залежнасці ад лексічнага
значэння ў родным склоне могуць мець канчаткі –а, (-я) і –у
(-ю):
размаўлялі каля клёна (прадмет) –
стол з клёну (матэрыял), падышлі да
перахода (прадмет) – спыніліся пасля
пераходу (дзеянне) [5, стар. 163,
“Беларуская мова”].
[3, стар. 232, “Беларуская
мова”]
[4,
стар. 97, “Беларуская мова”].
Праца са сказам.
Складзіце скорагаворку са слоў.
Каля, з, дуба,
крэслы, дубу, паставілі. (Каля дуба паставілі крэслы з дубу.)
• Растлумачце
напісанне выдзеленых літар.
Хвілінка кемлівасці.
Чытаем правіла.
Помніце! Канчатак –а (-я) характэрны для ўсіх
назоўнікаў ніякага роду [5, стар. 163, “Беларуская мова”].
Напрыклад: вясла, лісця.
Назавіце слова.
Пішам з а, я
Пляча, раздолля,
Свята,
мора,
… (Наваколля).
Аляксей Якімовіч.
• Растлумачце
правапіс літар а, я ў словах вершаванага
тэксту “пляча”, “раздолля”, “свята”, “мора”, “наваколля”.
Фізкультхвілінка.
На столі, на сцяне вачыма намалюйце прыгожыя літары а,
я,
потым напішыце беларускае слова “воблачка” і лагодна ўсміхніцеся, прывітайце
яго, добрае і ласкавае.
Ствараем праблемную сітуацыю.
• Як пішам: на
беразе ці на берагу? (1)
• Як пішам: на
дажджы ці на дажджу (2)
• Як пішам: у
краі ці ў краю? (3)
• Як пішам: на
шляху ці на шляхе? (4)
• Як пішам: пры
суседу ці пры суседзе, пры Генадзю ці пры Генадзі? (5)
Што трэба ведаць, каб адказаць на гэта пытанне?
Хвілінка кемлівасці.
Звяртаемся да правіла.
Запамінаем! У месным склоне адзіночнага ліку назоўнікі другога скланення маюць
канчаткі –е, --ы, -і, -у, -ю. Правапіс канчаткаў
залежыць ад зычнага асновы і значэння назоўнікаў:
1. Канчаткі –у, -ю маюць назоўнікі, якія
абазначаюць асобу чалавека, імёны і прозвішчы людзей: пры суседу, пры Генадзю.
2. Канчатак -у маюць назоўнікі з асновай на [г], [к], [х], калі яны не чаргуюцца з [з], [с]: на шляху.
3. Канчатак -і маюць назоўнікі з
асновай на мяккі зычны: у краі.
4. Канчатак -ы маюць назоўнікі з асновай на
зацвярдзелы зычны: на дажджы.
5. Канчатак -е маюць неадушаўлёныя назоўнікі з
цвёрдай асновай і асновай на [г], [х], калі яны чаргуюцца з [з′], [с′]: на беразе
[4, стар. 99, “Беларуская мова”].
• Дапоўніце
гэтыя азначэнні адпаведнымі прыкладамі з задання “Ствараем праблемную
сітуацыю”.
[3, стар.
231 -- 234, “Беларуская мова”]
Назавіце слова.
Пішам з і,
ы,
ю,
у
Пры жыцці, у гушчары,
Аб герою, пры Андрэю,
У пясочку, у … (бары).
Аляксей Якімовіч.
• Растлумачце
правапіс канчаткаў і, ы, ю, у ў словах вершаванага тэксту “пры жыцці”, “у
гушчары”, “аб герою”, “пры Андрэю”, “у пясочку”, “у бары”.
Адзначаем! Назоўнікі з цвёрдай асновай, што абазначаюць асоб, ужываюцца таксама і
з канчаткам –е: аб сыне, пры
Мікіце, аб Коласе.
Назоўнік “двор” у месным склоне ў залежнасці ад
лексічнага значэння можа мець канчатак –ы ці –э: на машынным двары, на дварэ холадна. Назоўнік “малако” ўжываецца з канчаткам –э:
на малацэ [5, стар. 163, “Беларуская
мова”].
Скорагаворка.
Аб Купале расказвалі пры браце (Аляксей Якімовіч).
• Якая
арфаграма паўтараецца ў словах скорагаворкі?
Праца з вершам.
Складзіце разбураны нядобрым чараўніком верш Аляксея
Якімовіча.
Ад ветру нахіліўся.
-- Ледзь ён не зваліўся.
Каля поля слуп струхлеў,
Дзве сарокі мне сказалі:
Адказ: 1 – 3, 2 – 1, 3 – 4, 4 – 2.
• Знайдзіце
ў вершы словы з арфаграмай на вывучанае правіла. Растлумачце іх напісанне.
Сустрэча з
фразеалагізмамі.
Назавіце фразеалагізмы ў вершах Аляксея Якімовіча, якія
абазначаюць “зусім сур’ёзна, на самай
справе” і “вельмі хутка, як толькі можна (бегчы, імчацца і г. д.)”.
-- Працуйце старанна,
Дбайна, без агрэху, --
Стануць паважаць вас…
… … .
Спалохаўся Міхасёк
Убачыўшы муху.
Войкнуў, паімчаўся
Ён дамоў … … .
• Назавіце назоўнікі другога
скланення ў вершаваных тэкстах. Вызначце іх склон і канчаткі.
Словы фразеалагізма,
напісаныя наадварот: ачарпа ухемс; зеб ухуд [1, стар. 20, 24, “Фразеалагічны
слоўнік”].
Узбагачаем мову словам Якуба
Коласа.
Раскрываючы дужкі, запішыце словы з выбарам літар.
Выразна прачытайце вершаваныя радкі Якуба Коласа.
-- Дзедку,
глянь, а што бліскае
Там, дзядок,
каля крыніц?
Блісь – і зараз
жа знікае…
Што за з’явіна
такая?
Што за забаўкі
начніц?
-- Эге ж,
хлопчыку: зман гэта,
На такі агонь
не йдзі:
Ні цяпла ў ім, ні прывет(у, а) –
Лепш туды і не
глядзі;
Не шукай агн(ю,
я) такога:
Не даецца ў
рукі ён,
Бо над ім вісіць праклён [2, стар. 399, “Паэмы Я. Коласа”].
• Раскрыйце
сэнс слова “начніцы”. (Кажаны, тут: нячыстая
сіла.)
• Якім
словам можна замяніць назоўнік “зман”? (Падман.)
• Пастаўце ў форме роднага склону
назоўнікі “падман”, “праклён”. (Падману, праклёну.) Што яны выражаюць? (Пачуцці.)
• Пастаўце ў форме меснага склону
назоўнікі з вершаванага тэксту Якуба Коласа “дзядок”, “хлопчык”. (Пры дзядку, пры хлопчыку.) Растлумачце правапіс іх канчаткаў.
• Пастаўце ў форме меснага склону
назоўнікі “падман”, “праклён”. (Аб
падмане, аб праклёне.)
Растлумачце правапіс іх канчаткаў.
Адказы на пытанні.
• Ад чаго залежыць правапіс канчаткаў назоўнікаў
2-га скланення мужчынскага роду ў родным склоне адзіночнага ліку?
• Якія
канчаткі маюць назоўнікі 2-га скланення адзіночнага ліку ў месным склоне? Ад
чаго яны залежаць?
Тэст.
• Назавіце
назоўнікі, якія стаяць у форме меснага склону адзіночнага ліку.
1. Лугу.
2. На паверсе.
3. Дажджу.
4. Поспеху.
5. У скверы.
7. Граду.
Адказ: 2, 5.
Выкарыстаная літаратура
1. Гаўрош,
Н. В і інш. Фразеалагічны слоўнік. Для сярэд. школы. Пад рэд. доктара
філалагічных навук Ф. М. Янкоўскага. –
Мн., “Нар. асвета”, 1973. – 352 с.
Перад загал. аўт. : Н. В.
Гаўрош, І. Я. Лепешаў, Ф. М. Янкоўскі.
2. Колас, Я.
Новая зямля; Сымон-музыка : паэмы / Я. Колас. —Мінск : Маст. літ., 1986. — 448
с.
3. Красней, В. П.,
Лаўрэль, Я. М. Беларуская мова : Падруч. для 5-га кл. шк. з беларус. мовай
навучання. – 3-е выд., дапрац. – Мн. : Нар. асвета, 1992. -- 318 с. : іл.
4. Беларуская мова : вучэб. дапам. для 6-га кл. устаноў
агул. сярэд. адук. з беларус. і рус. мовамі навучання : у 2 ч. / Г. М. Валочка [і
інш]. – Мінск : Нац. ін-т адукацыі, 2020. --
240 с.
5. Гваздовіч, Г. А. і інш.
Беларуская мова : Падруч. для 10-га кл. устаноў, якія забяспечваюць атрыманне
агул. сярэд. адукацыі з бел. мовай навучання з 11-гадовым тжэрмінам навучання /
Г. А. Гваздовіч, М. М. Круталевіч, У. П. Саўко. – 2-е выд., дапрац. – Мн. :
Нар. асвета, 2004. – 239 с.
6. Шэўчык, Н. І.,
Амяльковіч, А. А. Беларуская мова : Падручнік для 4-га класа. – Мн. : Нар.
асвета, 1977. -- 240 с. : іл.
Гэты ўрок (у ім
могуць быць некаторыя змяненні) надрукаваны ў часопісе “Беларуская мова і
літаратура”, сакавік 2021 года, № 3.