Аляксей
Якімовіч
СЛЯДЫ
Апавяданне
1
Скінуўшы ў калідорчыку туфлі, Павел Герасюк замкнуў
дзверы, зайшоў у пакой, лёг на ложак, заплюшчыў вочы і раскінуў рукі. Усё-ткі
стаміўся, нахадзіўся за дзень. Зараз ён крышку адпачне, падрэмле, а потым
наварыць бульбы і павячэрае. "Я і баба, і мужык, я і конь, я і бык",
-- нявесела падумаў пра сябе. Так, усё аднаму прыходзіцца рабіць. Сем гадоў,
дзень за днём, пасля таго, як развёўся з жонкай і пакінуў сям'ю.
-- Цяжка нам! Ой як цяжка нам! -- з калідорчыка нечакана
пачуліся два скрыпучыя галасы.
Павел устрапянуўся, расплюшчыў вочы і прыўзняў галаву,
прыслухоўваючыся.
-- Цяжка нам! -- у другі раз аднатонна, зладжана, як адзін,
праскрыпелі галасы.
У Паўла ёкнула сэрца. Ён асцярожна ўстаў з ложка, сціснуў
кулакі і падаўся на калідорчык. На калідорчыку анікога не відаць. І на кухні
няма.
Крыху пастаяўшы, Герасюк адчыніў дзверы ваннай, туалета,
але і там нікога не знайшоў.
-- Што ж гэта робіцца? -- прашаптаў ён і, азірнуўшыся,
зноў зайшоў у пакой і стаў каля акна.
На двары ярка свеціць летняе сонца, пенсіянеры на лаўцы
сядзяць, грэюцца, каля суседняга пяціпавярховіка ўчастковы стаіць.
-- Ой як цяжка нам! -- у трэці раз праскрыпелі галасы.
-- Таварыш лейтэнант, зайдзіце на хвілінку! Вельмі прашу
вас! -- адчыніўшы акно, гукнуў Павел.
2
Хвілін праз пяць у Паўлаву аднапакаёвую кватэру зайшоў
участковы. Павел паглядзеў на яго малады, ружовашчокі твар і міжволі ўздыхнуў.
Некалі і ён быў гэткі ж малады, ружовашчокі, а цяпер зусім пастарэў: валасы
сівыя, шчокі маршчыністыя, цёмныя кругі пад вачыма.
-- Чаго клікалі мяне, дзядзька Павел? -- прыемным баском
прагаварыў участковы.
-- Таварыш лейтэнант...
-- Вадзімам мяне завіце, -- перапыніў Герасюка ўчастковы.
-- Колькі разоў вам казаць!
Не, у яго, Паўла, ніколі не павернецца язык гэтага
прыгожага хлопца ў міліцэйскай форме Вадзімам назваць. Ён прадстаўнік улады,
як-ніяк.
-- Таварыш лейтэнант, я нядаўна на ложак прылёг, а з
калідорчыка галасы данесліся.
Участковы Вадзім аж папярхнуўся.
-- Чые галасы?
-- Не ведаю. Яны на сваё жыццё скардзіліся. Я ўсю кватэру
абшукаў, але нікога не знайшоў.
-- А я што магу зрабіць? -- заморгаў вачыма ўчастковы.
3
У гэты вечар галасы больш не трывожылі Паўла. А на другі
дзень, калі ён, прыйшоўшы з працы, як звычайна, разуўся і прылёг на ложак, яны
далі знаць пра сябе.
-- Цяжка! Ой як цяжка нам! -- скрыпуча паскардзіліся.
Герасюк ускочыў з ложка і выбег на двор. Ён крочыў па
тратуары, утуліўшы галаву ў плечы і нікога не заўважаючы. Раптам хтосьці схапіў
яго за руку і сказаў:
-- Сваіх не пазнаеш?
Павел павярнуўся і ўбачыў Ніну, з якой пазнаёміўся ў
мінулым месяцы. Жыццё ў яе, як і ў яго, чамусьці не складвалася. Яна два разы
выходзіла замуж і два разы разводзілася.
Пасля апошняй сустрэчы Ніна змянілася. Валасы на яе
скронях моцна пасівелі.
-- Іду, а галава рознымі думкамі занятая! --
апраўдваючыся, сказаў Павел.
-- Ты заўсёды заняты чалавек. У цябе куча розных спраў,
-- з'едліва прагаварыла Ніна.
Герасюку стала няёмка. У час апошняй сустрэчы ён, можна
сказаць, прагнаў Ніну са сваёй кватэры.
Стомленая і знерваваная прыйшла яна да яго.
-- Сёння я ў цябе застануся, -- заявіла, сеўшы на крэсла.
А ён яшчэ раней вырашыў: больш не будзе сустракацца з
Нінай. Не пара яны. Яму ўжо за пяцьдзесят, а ёй толькі сорак.
-- Ніначка, -- сказаў тады пяшчотна, каб вельмі не
пакрыўдзіць, -- мне няма калі. Я перакушу і пабягу. Справы ў мяне.
Ніна паглядзела на яго поўнымі болю вачыма.
-- Я пачакаю цябе. Калі трэба, есці звару ці адзенне памыю.
-- Кажу табе, што мне няма калі! -- з раздражненнем
прамовіў ён.
Жанчына цяжка ўздыхнула.
-- Каб ты ведаў, як мне не хочацца дамоў вяртацца! Сын з
нявесткай цэлымі днямі сварыцца.
-- У мяне куча спраў! Зразумей! -- усклікнуў ён.
Ніна моўчкі ўстала і пайшла, згорбіўшыся, як старая.
Не спадзяваўся ён, што сёння яе сустрэне. Можа, яна
што-небудзь параіць яму.
-- Ніначка, -- сказаў пяшчотна, як і тады, калі выпраўляў
з кватэры, -- у цябе скроні зусім пасівелі.
-- З тваёй ласкі, Павел, -- выказалася кабета і,
адпусціўшы ягоную руку, таропка пакрочыла па тратуары.
"У той раз я яе прагнаў, а цяпер яна мяне пакінула,
не стала слухаць. Тое зло, якое я ёй прычыніў, бумерангам да мяне
вярнулася", -- падумаў Герасюк і пацягнуўся дамоў.
4
Звечарэла. Павел распрануўся і лёг на ложак. Ён
спадзяваўся, што адразу ж засне, стомлены хадзьбой. Але не далі паспаць галасы,
як звычайна, праскрыпеўшы:
-- Цяжка! Ой як цяжка нам!
Герасюк стукнуў кулаком па ложку.
-- А мне, вы думаеце, лёгка?
Галасы, відаць, не чакалі, што ён дасць ім адпор.
-- Ты з намі спрачаешся? -- пацікавіліся яны.
-- Я вас не хачу чуць! Мне заўтра раніцай на працу трэба
ісці, мне трэба выспацца! -- са злосцю крыкнуў Павел, а ў галаве прабегла:
"Сапраўды, як з роўняй, спрачаюся з імі".
-- І нам заўтра раніцай на працу трэба ісці, --
паведамілі галасы.
-- Хм, -- хмыкнуў Герасюк. Злосць прайшла. На душы стала
неяк спакайней. -- Куды, дазвольце пацікавіцца?
-- Скажам. але крыху пазней, -- праскрыпелі галасы.
Павел сеў на ложку, углядаючыся ў цемру.
-- Вы доўга будзеце мяне мучыць?
-- Мы таксама мучымся, бо жывём з табою, -- адказалі
галасы.
-- Раней я не мучыўся, нармальна жыў, -- не пагадзіўся
Павел.
-- А ты добра падумай, успомні тыя гады, што, як адзін
дзень, прабеглі ў цябе, -- не здаваліся галасы.
Паўлу надакучыла гэтая спрэчка.
-- Пакажыцеся, шаноўныя! Я вас хачу ўбачыць!
-- Заўтра нас убачыш, -- адказалі галасы.
-- І за гэта дзякуй! -- крыва ўхмыльнуўся Герасюк.
-- Спі. Мы больш не патрывожым цябе, -- паабяцалі галасы.
Павел лёг на падушку і заплюшчыў вочы. Ён зразумеў, што
галасы не такія страшныя. З імі па-добраму можна дамовіцца.
5
Раніцай Герасюка сустрэў участковы.
-- Дзядзька Павел, галасы больш не трывожаць вас?
-- Не трывожаць, маўчаць, -- схлусіў Павел. Пакуль няма
як казаць праўду ўчастковаму. Галасы паабяцалі, што сёння з'явяцца перад ім.
Сёння ён сам з імі разбярэцца.
-- Дзядзька Павел, -- усміхнуўся лейтэнант, -- калі зноў
пачуеце іх, то патэлефануйце мне.
"А што ты ім зробіш?" -- падумаў Герасюк.
6
У дванаццаць гадзін ночы Павел выключыў святло і сеў каля
стала на крэсла. Ён адчуваў: галасы неўзабаве дадуць знаць пра сябе.
За акном, бясшумна рассякаючы паветра, як дзіўныя здані,
праносіліся кажаны, воддаль гудзелі машыны, прарэзлівы жаночы крык прымусіў
Паўла ўздрыгнуць.
-- Сядзіш? -- данеслася з калідорчыка.
-- Сяджу, -- хрыплым голасам прамовіў Павел і павярнуўся.
Крэсла зарыпела пад ім.
-- Зайдзі на калідорчык і ўключы святло.
Герасюк паволі ўстаў і, спатыкаючыся, зайшоў на
калідорчык.
-- Уключы святло!
Кончыкам пальца, па якім прабеглі мурашкі, Павел намацаў
выключальнік і ўключыў святло. Анікога ў калідорчыку не відаць. Толькі туфлі
стаяць у куце.
-- Не бачыш нас. Адыдзіся назад і глянь перад сабою.
Павел ступіў два крокі назад і ўбачыў, што ягоныя туфлі
прыўзняліся, і з-пад іх выйшлі Сляды: з ромбікамі-рубчыкамі, з абцасікамі.
-- Э! -- разявіў рот Герасюк. -- Вы мае Сляды?
Сляды тупнулі абцасікамі па лінолеуму, якім быў засланы
калідорчык.
-- Мы твае Сляды!
-- Вы са мною размаўлялі?
-- Мы!
Павел правёў рукою па грудзях, стараючыся скінуць страх і
цяжар з душы.
-- Чаго ж вы хочаце ад мяне?
Сляды ступілі крок наперад і сталі.
-- Мы табе хочам паказаць, што ты не так жывеш.
Герасюк прытуліўся да сцяны.
-- Я жыву так, як многія жывуць.
-- Не так! -- запярэчылі Сляды. -- Заўтра гэта дакажам.
Разам з табою пойдзем у горад. Ты за намі будзеш ісці.
Павел далонню пастукаў сабе па цемечку.
-- Вас людзі заўважаць. Немаведама што падумаюць.
-- Не заўважаць. Ты часта заўважаеш чужыя сляды?
-- На чужыя сляды я не гляджу, -- прызнаўся Павел. -- А
куды ж вы, хацелася б ведаць, мяне паведзяце?
-- Туды, дзе ты пакінуў свае сляды, -- паведамілі Сляды і
сталі ў кут, каля туфляў.
7
На наступны дзень, у нядзелю, абмінаючы прахожых, Сляды
смела тупацелі па тратуары. Ніхто іх не заўважаў.
Стараючыся не адстаць, Герасюк крочыў за Слядамі.
"Куды ж яны вядуць мяне?" -- думаў ён. Яму было і цікава, і крыху
страшнавата, як студэнту перад чарговым экзаменам.
Пачакаўшы, пакуль загарыцца зялёны агеньчык святлафора,
Сляды перайшлі вуліцу і падаліся ў гарадскі парк.
На скасабочанай лаўцы, некалі пафарбаванай на чырвоны
колер, сядзела бабуля з кіёчкам у руках. Побач з ёю ляжаў вузялок.
Старая ўсё-ткі заўважыла Сляды. Падслепаватымі вачыма яна
ўставілася на іх.
-- А Божачка мой! Сляды ідуць!
-- Гэта мае Сляды, -- пастараўся супакоіць бабулю Павел,
прыпыніўшыся каля яе.
Абедзвюма рукамі бабуля абаперлася аб кіёчак.
-- Яны, выходзіць, уцяклі ад цябе?
-- Не зусім так. Яны са мною жывуць, -- удакладніў
Герасюк.
А Сляды павярнуліся да бабулі і сталі танцаваць, мабыць,
каб пацешыць яе.
-- Танцуюць! -- усклікнула старая.
Хмурынка прабегла па твары Паўла.
-- Польку, -- сказаў ён. -- Як некалі я танцаваў. Мае
Сляды маю маладосць успомнілі.
Станцаваўшы польку, Сляды пакрочылі далей. І Павел
накіраваўся за імі, развітаўшыся з жанчынай.
-- Шчаслівай дарогі табе, сынок! -- пажадала яна.
8
Сляды прывялі Герасюка да дома, у якім жыла ягоная дачка
Валя. Ён даўно з ёю не бачыўся. Аднаго разу, гадоў пяць таму, у такі ж цёплы
летні дзень ён завітаў да Валі, а яна яго не пусціла, выпаліўшы ў твар:
-- Не хадзі да нас! Ненавіджу цябе!
Сляды сталі каля пад'езда і звярнуліся да Паўла:
-- Адчыняй дзверы.
-- Не пайду туды! -- пакруціў галавою Павел.
-- Тут твая дачка жыве.
-- Яна адмовілася ад мяне, прагнала. А я ж яе ў садок
вадзіў, у школу адпраўляў, потым ва ўніверсітэт уладкаваў, вывучыў. За маму
пакрыўдзілася на мяне.
-- Трэба было не толькі вучыць, але і выхоўваць, --
папракнулі Сляды.
Павел адчуў, як даўкі камяк падступіў да горла.
-- Я стараўся, выхоўваў. Зразумейце мяне!
Сляды не хацелі разумець Паўла.
-- Выходзіць, не так выхоўваў. Адчыняй!
Павел уявіў, як у той раз бягом спусціўся па лесвіцы і
выскачыў з пад'езда. Цэлы тыдзень не мог дайсці да сябе, з вачэй слязінкі
змахваў.
-- Яна мяне зноў прагоніць.
-- Не прагоніць! Час лечыць раны, -- у нецярпенні тупнулі
абцасікамі Сляды.
Герасюк узяўся за ручку і адчыніў дзверы. Хоць і
адчужылася дачка, але яна ягоная крывіначка. Хіба не хочацца яму паглядзець на
яе і на ўнучку Марынку, якую бачыў толькі здалёку, крадком прыходзячы да садка,
у які вадзіла яе мама.
9
Дачка пусціла яго ў кватэру, нават запрасіла на кухню і
пасадзіла на табурэтку. А Сляды схаваліся ў куце, дзе стаяў абутак.
-- Як жывеш, дачушка? -- нясмела кашлянуў Павел.
Валя стаяла каля акна, скрыжаваўшы рукі на грудзях.
-- Як усе людзі жывуць.
На кухні павісла прыкрая цішыня. "Я тут не свой і не
чужы. Я ніякі", -- падумаў Герасюк і зноў кашлянуў у кулак.
-- Твой Генадзь дома?
-- Дома. У зале тэлевізар глядзіць, -- Валя гаварыла
адрывіста, суха, як, бывае, знерваваны прадавец гаворыць з пакупніком.
-- І Марынка дома?
-- Марынка, бяжы сюды! Твой дзядуля прыйшоў! -- націснуўшы
на слова "дзядуля", гукнула дачка.
На кухню прыбегла бялявенькая пухленькая дзяўчынка з
вялікім белым бантам на галаве і стала, дзівячыся на Паўла. Павел засунуў руку
ў кішэню і намацаў грошы. А Марынка паказала яму ружовенькі язычок і,
затупацеўшы тоўсценькімі ножкамі, выбегла з кухні.
Паўлавы вусны скрывіліся ва ўсмешцы.
-- Дзічыцца яна мяне.
Шчокі ў Валі пачырванелі. Яна страсянула галавою. Відаць,
хацела сказаць штосьці колкае, але стрымалася, узяла сябе ў рукі.
-- Есці будзеш?
"Хіба я не марыў, песцячы цябе, дачушка, што сваю
ўнучку за ручку буду вадзіць? Я ж такі, як і ўсе", -- думаў Герасюк,
пазіраючы на дачку.
-- Есці будзеш? -- рэзка паўтарыла Валя і ўсміхнулася,
паказаўшы роўныя белыя зубы.
У Паўла закружылася галава. Твар дачкі расплыўся перад
вачыма. Яму здалося, што ён бачыць не белыя зубы, а востранькія клычкі. Ён
устаў, выняў з кішэні жменю грошай, прыплюснуўшы далонню, паклаў іх на стол і
выйшаў на калідор.
Валя сама адчыніла яму дзверы, сказаўшы на развітанне:
-- Мы ніколі не разумелі адно аднаго.
10
На двары Герасюк доўга і часта дыхаў, глытаючы цёплае
паветра, як глытае яго рыба, выкінутая на бераг, а затым пацікавіўся ў Слядоў:
-- Куды яшчэ мяне заведзяце?
-- Да жонкі!
Ён стаяў на шумнай, шматлюднай вуліцы, а яму здавалася,
што стаіць у пустыні, дзе тысячы распаленых сонечных праменьчыкаў, як
іглінкамі, працінаюць яго, каб прычыніць боль.
-- У мяне няма жонкі.
-- Да той, якая была ў цябе!
"Бум-бум-бум..." -- гучна, працягла разнеслася
ў паветры.
Павел наморшчыў лоб.
-- Што гэта?..
-- Царкоўныя званы звіняць, -- паведамілі Сляды.
Герасюк пажвавеў, дыхаць стала лягчэй, і боль у целе
суцішылася.
-- Вядзіце мяне ў царкву!
-- Дарогі не ведаем. Ты ж туды ні разу не хадзіў.
Павел стаяў і ўсміхаўся, як дзівак. Сапраўды, у мясцовай
гарадской царкве ён ні разу не быў. А ў дзяцінстве ў сваю, у вясковую царкву,
хадзіў. Маці за ручку яго вадзіла. Як добрае, як светлае свята ўспамінаецца гэта.
Столькі гадоў прайшло, а ўспамінаецца.
-- Хадзем да жонкі! -- напомнілі Сляды.
-- Не пайду да яе, -- упёрся Павел. -- Я не вінаваты, што
развёўся. Яна да разводу мяне давяла.
-- У чымсьці і ты быў вінаваты, -- не здаваліся ўпартыя
Сляды. -- Відаць, мала ўвагі ёй удзяляў. Іншыя на святы кветкі ёй дарылі, а ты
не дарыў.
-- Прыходзіла з падарункамі! -- прызнаўся Павел і
наблізіўся да Слядоў. -- Вы хочаце, каб я праз пекла прайшоў. Чаму?
-- Мы хочам. каб ты зразумеў, для чаго на свеце жывеш, --
прагаварылі Сляды.
-- Дзень прайшоў -- і дзякуй Богу, -- панурыўся Павел.
Сляды, як і каля пад'езда Валінага дома, у нецярпенні
тупнулі абцасікамі.
-- Хадзем!
-- Хадзем. Усё роўна не адчэпіцеся вы ад мяне, -- махнуў
рукою Герасюк.
11
За сем гадоў, што мінулі пасля разводу, жонка, як і ён,
пастарэла, але, было відаць, сачыла за сабою. Ад яе пахла дарагімі духамі,
доўгія пазногці былі наманікюраныя, а галаву ўпрыгожвала мадэльная прычоска.
Яны сядзелі насупраць адно аднаго ў мяккіх крэслах.
-- Яшчэ не жаніўся? -- весела прагаварыла яна.
-- Ты ж таксама замуж не выйшла, -- адпарыраваў Павел.
-- Былі прапановы, -- сказала жонка і расхінула халат,
паказаўшы круглае загарэлае калена.
Герасюк адвёў позірк убок.
-- Развяліся, а маглі б жыць, як людзі жывуць!
Жонка скоса паглядзела на яго.
-- Сам уцёк.
Павел устаў з мяккага крэсла. "Сам уцёк..." Ад
добрага жыцця не ўцякаюць. Што ж, ён стрымае эмоцыі, што бурляць у душы, не
будзе спрачацца. Гэтай улюблёнай у сябе жанчыне нічога не дакажаш. Няхай Бог
даруе ёй.
-- Ну, я пайду.
Жончын твар неяк адразу асунуўся.
-- Ідзі, -- ціха прамовіла яна.
12
Апаўдні разам са Слядамі Павел вярнуўся дамоў. Ён адчыніў
акно і сеў на крэсла. Сляды сталі побач, каля стала.
У кватэры было ціха.
-- Вас мая жонка так і не заўважыла, хоць вы за мною
выйшлі, у калідоры крыху патаптаўшыся, -- парушыў маўчанне Павел.
Слядам, відаць, стала няёмка. Яны ўздыхнулі.
-- Мабыць, тады заўважыць, калі зусім пастарэе і нікому
не будзе патрэбна.
-- Мабыць! -- адгукнуўся Герасюк. -- Я кепскі, я нядобры!
Так?
-- Вельмі строга не судзі сябе, -- заўважылі Сляды. --
Паўдня з намі прахадзіў, а нічагуткі не зразумеў. Быллём парасло тое, што было.
Не вернеш яго. Жыць трэба.
-- Як жыць? -- запытаўся Павел.
Сляды не паспелі адказаць, бо зазвінеў электрычны званок.
Павел ускочыў з крэсла і, адчыніўшы дзверы, убачыў
участковага з вялікай аўчаркай на павадку.
-- Сабаку ўзяў. Магчыма, яна мне дапаможа знайсці вашага
жартаўніка, -- паведаміў ён.
Сабака застрыг вушамі і ашчэрыў зубы.
Герасюк адступіў, а ўчастковы разам з аўчаркай зайшоў у кватэру.
-- Таварыш лейтэнант! -- у роспачы закрычаў Павел.
-- Сляды стаяць! -- тыцнуў рукою ўчастковы, паказаўшы на
Сляды, якія стаялі, задраўшы насы.
Аўчарка забрахала, поўсць на ёй уздыбілася.
-- Навошта ты іх пусціў сюды? -- крыкнулі Паўлу Сляды.
-- Яны жывыя! -- усклікнуў участковы і адпусціў павадок.
Сляды ўскочылі на крэсла, з крэсла пераскочылі на стол,
са стала -- на падаконнік і зніклі з вачэй. Раз'юшаная аўчарка таксама
выскачыла за імі праз акно.
-- Таварыш лейтэнант, што вы нарабілі?! Гэта ж мае Сляды!
Я сваё жыццё змяніў бы, калі б яшчэ крыху з імі пабыў, -- з дакорам прагаварыў
Герасюк.
-- Дзядзька Павел, за мною! Мы знойдзем іх! -- гукнуў
участковы і ірвануўся да дзвярэй.
Участковы і Павел на аўтобусным прыпынку ўбачылі аўчарку.
Яна стаяла і выла, узняўшы галаву. Людзі, што сабраліся тут, насцярожана
пазіралі на яе.
-- Гаспадара згубіла. Вось і плача! -- прамовіў хтосьці з
іх.
Участковы падышоў да сабакі і пагладзіў яе. Аўчарка
лізнула яго ў руку.
-- Сляды ў аўтобус ускочылі і паехалі. Увесь горад
абшукаю, а знайду іх! -- сказаў Герасюк і, шырока ступаючы, пакрочыў па
тратуары.
Выдадзена ў выдавецтве
“Беларусь”.
Якімовіч, А.
М. Русалка : фантастычна-містычныя
апавяданні / Аляксей Якімовіч . – Мінск
: Беларусь, 2020. – 136 с.