Быў выпадак
Малпы
Разнастайны і незвычайны жывёльны свет.
Так, вельмі цікава паводзяць сябе многія малпы ў
паўсядзённым жыцці і розных крытычных сітуацыях.
Капуцыны, напрыклад, здабываючы ежу, выкарыстоўваюць
такія прылады працы, як кіі ці каменні. Назіраючы за іх жыццём, можна
заўважыць, што з дапамогай спецыяльна падабранага кія яны са шчыліны выганяюць
яшчарак, каб потым напасці на іх. Круглым каменем капуцыны разбіваюць цвёрдыя
арэхі, паклаўшы іх на плоскі камень. Вучоныя мяркуюць: гэтаму яны навучыліся
тры тысячы гадоў таму, што і дапамагло ім выжыць у самых неспрыяльных
умовах.
Жоўтыя павіяны ніколі не пакідаюць сваіх суродзічаў у
бядзе. Быў такі выпадак. На аднаго жоўтага павіяна напаў леапард. Той вырваўся
ад пятністага драпежніка і схаваўся на высокім дрэве. Леапард усё-такі знайшоў
яго там, залез на дрэва. Тады на дапамогу няшчаснаму прыбеглі іншыя члены яго
сям’і. Яны ўскарабкаліся на дрэва, сталі крычаць, адганяючы леапарда. У гэты
час паранены жоўты павіян саскочыў на зямлю. Леапард пабаяўся там нападаць на
яго, адступіў.
А макакам часта хітрыка дапамагае здабываць ежу. Яны не
заўсёды могуць знайсці на дрэве смачныя плады. Таму, набраўшыся цярпення, чакаюць,
калі іх знойдзе вавёрка. І, дачакаўшыся, адганяюць яе. Калі ж яна не
адступаецца, скідаюць плады на зямлю, дзе і ядуць іх разам з суродзічамі.
На востраве Мадагаскар жывуць лямуры. Яны з дапамогай
лекаў праганяюць кляшчоў, якіх нямала ў джунглях. Лямуры злізваюць з дрэў
мураўіную кіслату і, размяшаўшы яе са слінай, націраюць поўсць. Такі пах
адпалохвае не толькі кляшчоў, але і іншых насякомых.
Аляксей Якімовіч
