Быў выпадак
Галубы
Ёсць тры віды галубоў: голуб шызы, вяхір і клінтух. Голуба шызага называюць
свойскім. Для свайго жылля ён выбірае населеныя пункты. А вяхір і клінтух
здаўна сяліліся ў лясах. Цяпер, кажуць, з лясоў сталі перабірацца бліжэй да
людзей: у вёску, у горад.
Раскажу пра два выпадкі, звязаныя з іх паводзінамі.
Аднаго разу, зірнуўшы праз акно на дарогу, якая праходзіць у нашым
мікрараёне, убачыў голуба з белай плямай на шыі. Ён (выкарыстаў момант, калі не
было машын) павольна рухаўся праз дарогу ў напрамку тратуара. Яго крылы
апусціліся да самай зямлі. Час ад часу ён узмахваў імі. “Паранены! – падумаў я.
– Хоча ўзляцець, а не выходзіць, не паднімаюць яго пашкоджаныя крылы”.
Так і не дабраўшыся да тратуара, голуб павярнуўся і зноў, трапечучы
абяссіленымі, як мне здавалася, крыламі накіраваўся на сярэдзіну дарогі. Там
стаў таптацца, цяжка прысядаючы. У гэты час з-за вугла дома выскачыў кот. Як
страла, ён ляцеў да голуба. Зусім блізка падпусціў яго голуб да сябе і,
узмахнуўшы крыламі, паляцеў. Кот спыніўся і гучна мяўкнуў, аблізнуўшыся.
Голуб падмануў не толькі мяне, але і ката. Ён падцкоўваўся, дражніўся з ім,
прытварыўшыся параненым.
Пра другі выпадак расказала знаёмая.
Каля прыпаркаванай паблізу дома легкавушкі прагульваўся кот. Неўзабаве
прыляцеў голуб з белай плямай на шыі і прымасціўся непадалёку на дрэве. Кот
насцярожыўся, прысеў і стаў пазіраць на яго. А бесклапотны, так падумала мая
знаёмая, голуб раптам апусціўся на зямлю і павольна пачаў набліжацца да
аўтамабіля. Седзячы за колам, кот з нецярпеннем глядзеў на яго, а затым амаль
што не паўзком стаў набліжацца да птушкі Неўзабаве перабраўся да другога кола і
прытаіўся там. Голуб усё бліжэй да яго. Некалькі метраў раздзяляе іх. Кот
імкліва выскачыў з-за кола. Голуб узняўся і паляцеў. Пакружыўся, пакружыўся і
зноў прымасціўся на дрэве. Так паўтарылася некалькі разоў.
Лічу, што гэта былі не свойскія шызыя голубы, а лясныя вяхіры. На шыі і крылах
у іх выдзяляюцца белыя плямы.
“Гхуу-гху-ху… гхуу-гху—ху…”—вельмі часта гучна буркочуць яны.
Не чулі?
Голуб з
коцікам,
Як з мышкаю, гуляе.
Дарма кіпцікі
Коцік настаўляе.
