Экспертыза “Падлетак і алкаголь”
Назавём яе Марыся. Яе сын вечарамі ідзе
гуляць з сябрамі, а прыходзіць дамоў з пахам спіртнога. У адказ на заўвагу ці
абурэнне маці апраўдваецца: кажа, што выпіў толькі піва, што яго п’юць у такім
узросце ўсе яго знаёмыя, лічыць, што яно яму не нашкодзіць.
• Як Вы, нашы эксперты, ацэньваеце гэту сітуацыю?
• Што зрабілі б у дадзеным выпадку?
Эксперт Ірына.
-- Марыся, часцей размаўляйце з Андрэем.
Растлумачце яму, што піва, як і гарэлка, вядзе да хуткага алкагалізму, а віно
разбурае арганізм, у прыватнасці, печань. Звяртайце яго ўвагу на алкаголікаў,
якія жывуць у Вашым населеным пункце, каб ведаў, што і яго ў будучым можа
чакаць падобны незайздросны лёс.
Эксперт Міхась.
-- Раней, у дасавецкі час, аматараў
спіртнога можна было пералічыць на пальцах адной рукі. Людзям не было калі
піць. Трэба было ўстаць рана-раненька, разам з сонцам, каб распачаць працу на
гаспадарцы: касіць, араць зямлю, выконваць іншыя работы.
І Андрэя трэба прывучаць да працы,
магчыма, на дачным участку. Няхай папацее, пралье пот, каб потым Вы, Марыся, не
пралівалі горкія слёзы.
Эксперт Святлана.
-- Многія вучоныя лічаць, што каля
сарака працэнтаў насельніцтва зямлі схільна да алкагалізму. Такія людзі не
могуць кантраляваць сябе, звычайна напіваюцца да свінячага енку. Алкаголь ім
супрацьпаказаны. Магчыма, і Андрэй адносіцца да дадзенай катэгорыі людзей. Яму
няможна піць. Як я зразумела, ён выпівае пастаянна, сістэматычна, не прапускае
ніводнага падобнага выпадку.
Эксперт Міхась.
-- Лічу, што кепскіх сяброў выбраў
Андрэй. Я такіх за кіламетр абыходзіў бы. Парэкамендаваў бы яму знайсці добрую
дзяўчыну і з ёю бавіць вольны час. Магчыма, разам яны знайдуць сваё шчасце.
• А як да гэтай сітуацыі адносіцеся Вы, нашы чытачы?