Быў выпадак
Востры нюх
У звяроў, як вядома, вельмі востры нюх.
Панюхаўшы след, яны беспамылкова могуць вызначыць, хто
тут прайшоў, пазнаюць свайго суродзіча ці ворага. Гэта ім патрэбна для таго,
каб здабыць ежу ці наладзіць нейкае знаёмства, напрыклад, знайсці сабе пару для
далейшага жыцця.
А ці ёсць людзі з падобным звярыным нюхам?
На гэта пытанне можна адказаць так: іх няшмат, але яны ёсць, сустракаюцца
сярод нас.
Вось якія эксперыменты праводзілі даследчыкі, каб
упэўніцца, ці адпавядае гэта сапраўднасці.
Эксперымент першы. У глыбокую талерку высыпалі (у
выглядзе парашка) розныя прыправы, спецыі: чорны і чырвоны перац, гваздзіку,
пятрушку і іншыя. Усяго дзевяць відаў аднаго колеру. Потым іх старанна
перамяшалі.
Чалавек з вострым нюхам (назавём яго Максім) лыжкай браў
гэту сумесь і старанна нюхаў. У выніку ён беспамылкова назваў усе прыправы,
якія даследчыкі змяшалі ў талерцы.
Эксперымент другі.
Максіму завязалі вочы і прывялі ў памяшканне некалькі
дзяўчат. Ён набліжаўся да кожнай з іх, старанна нюхаў і вызначаў не толькі пол
асобы (у дадзеным выпадку жаночы), але і раскрываў уласцівасці яе характару:
тэмпераметр, напрыклад, сексуальнасць. Казаў, якой працай займаецца, замужняя
ці незамужняя, мае ці не мае дзяцей, які ў яе характар. Калі ж побач паставілі
мужчыну, не дакрануўшыся да яго, паведаміў, што гэта мужчына, які курыць, п’е
піва. Потым мужчына прызнаўся, што ў яго ёсць такія шкодныя прывычкі.
Падрыхтаваў Аляксей Якімовіч
