Прывязаная бабуля
Расказвае Аляксей.
Глядзеў тэлеперадачу з суседняй краіны.
Бабулю з кавідам паклалі ў бальніцу.
Праз нейкі час яе ўнук (назавём яго Сяргей) вырашыў пацікавіцца, як адчувае
сябе яго блізкі чалавек. На яго тэлефонныя званкі яна не адказвала, медыцынскія
работнікі таксама з ім стараліся не ўступаць у кантакт. Адчуўшы нядобрае,
Сяргей купіў спецадзенне (маску, плашч) і пад выглядам урача прабраўся ў тую
палату, дзе ляжала яго бабуля. Брудная, непамытая, яна была прывязаная да ложка.
Ложак стаў непрывабным туалетам. Было відаць, што ніхто з медыцынскага персаналу
да яе даўно не падыходзіў. Сяргей сфатаграфаваў даведзены да поўнай
антысанітарыі ложак з бабуляй і паслаў у інтэрнэт. Думаеце, такім чынам дапамог
ёй? Не, нашкодзіў і сабе. Праз нейкі час яго, электразваршчыка са стажам, звольнілі
з працы, сказаўшы: “Ты нам не патрэбен”.
Ніхто з удзельнікаў тэлеперадачы,
пачуўшы гэта, не абурыўся. Удзельнікі выслухалі тэлевядучага і сталі
абмяркоўваць іншыя праблемы. Гэта іх амаль не закранула.
• Як Вы, нашы эксперты, ацэньваеце гэту сітуацыю?
• Што зрабілі б у дадзеным выпадку?
Эксперт Вадзім.
-- Сяргей, канешне, здзейсніў учынак, за
што і пацярпеў. Думаю, ён знойдзе працу, сваё месца ў жыцці. Не ўсе ж вакол яго
халодныя, бяздушныя, ледзяныя.
Эксперт Ніна.
-- А я магу зразумець медыцынскіх
работнікаў. Хворых шмат, безліч, а іх мала, не хапае. Яны фізічна не могуць
дагледзець хворых. Таму і прывязалі бабулю.
Эксперт Пятрусь.
-- А я лічу, што да ложка трэба было
прывязаць не бабулю, а нейкага важнага чыноўніка. Калі ён ішоў на працу, то
абяцаў стварыць для людзей рай. Дык чаму яго не стварыў? Няхай паляжаў бы ў
брудзе некалькі дзён і падумаў бы.
Эксперт Святлана.
-- Гэты выпадак прымушае задумацца: а
для чаго мы працуем, жывём? Каб потым, у нейкі судны дзень, нас прывязалі да
ложка?
Эксперт Даніла.
-- Мы асуджаем зверствы захопнікаў у
гады вайны, а іншы раз не бачым таго (ці не хочам бачыць), што робіцца пад
носам. Падобныя адносіны да старога, нямоглага чалавека – сапраўднае зверства,
злачынства.
• А як да гэтай сітуацыі адносіцеся Вы, нашы чытачы?