Экспертыза “Хлеб з плесенню”
Купіў у магазіне хлеб ва ўпакоўцы. На
другі дзень распакаваў яго і заўважыў, што ён чэрствы, з плесенню. Асабліва
ярка праявіла сябе плесень на наступны дзень: яна стала ўжо не белая, не
сіваватая, а сіняватая. Хацеў звярнуцца ў магазін з прэтэнзіяй, але не збярог
квіток, у якім пазначалася мая пакупка. Прыйшлося выкінуць гэты нез’едзены
хлеб.
• Як Вы, нашы эксперты, ацэньваеце гэту сітуацыю?
• Што зрабілі б у дадзеным выпадку?
Эксперт Ганна. Гэта наша сучаснае
дзікунства. Нас часта кормяць нітратамі, хіміяй, асабліва шмат нітратаў у тых
прадуктах, якія вырошчваюць у агародзе. Хімія і ў клубніцах, і ў агурках, і ў
памідорах, якія мы купляем для сваіх дзяцей. Дзеля таго, каб атрымаць прыбытак,
людзі не шкадуюць людзей: няшчасныя расліны пасыпаюць і паліваюць хіміяй без
канца.
Эксперт Андрэй. Усё-ткі трэба было б
табе звярнуцца ў магазін, напісаць заўвагу ў кнігу скаргаў.
Эксперт Алена. Сумняваюся, што ў
магазіне далі б кнігу скаргаў. Як пакупнік без квітка мог бы даказаць, што
купляў тут хлеб? Яго маглі б абвінаваціць у паклёпе.
Эксперт Марына. Даю такую параду.
Абавязкова правярайце на ўпакоўцы тэрмін годнасці прадуктаў, асабліва калі
бачыце, што хлеба на прылаўку няшмат. Прадаўцы вельмі часта хаваюць на складзе свежы
хлеб, а выстаўляюць пратэрмінаваны, стараюцца хутчэй яго збыць, прадаць.
Эксперт Насця. Не кожны прачытае, што на
ўпакоўцы напісана дробненькім шрыфтам. У такім выпадку патрабуйце кнігу скаргаў
і пішыце заўвагу, правучыце нядбайных прадаўцоў.
• А як да гэтай сітуацыі адносіцеся Вы, нашы чытачы?