Першы дзень на працы
Паведамляе Пятрусь.
-- Я яшчэ студэнт, але неўзабаве закончу
вышэйшую навучальную ўстанову. Мяне чакае першы працоўны дзень. Канешне,
хвалююся. Не ведаю, як мяне сустрэнуць на працы, як складзецца яна.
Што мне параіце?
• Што Вы, нашы эксперты, думаеце пра гэта. Якім быў Ваш першы працоўны
дзень?
• Што параілі б Петрусю?
Эксперт Антось.
-- Добра помню свой першы працоўны
дзень. Мне здалося, што навокал усё шэрае: калідор, кабінеты, людзі. Было
цяжка, хацелася нават заплакаць, паскардзіўшыся на свой лёс. Але паступова я
прывык да гэтай шэрасці. Напэўна, і сам стаў такі ж шэры. Прывыкнеш і ты.
Чалавек да многага прывыкае.
Эксперт Насця.
-- На працы мяне сустрэлі насцярожана.
Відаць, не паверылі, што нешта ўмею, што змагу справіцца з даручаным заданнем.
Старалася як мага, хацелася спадабацца калектыву. І праз нейкі час стала там
сваёй. Старайся і ты. І тады, павер мне, дасягнеш пастаўленай мэты.
Эксперт Уладзімір.
-- Не заўсёды старанне выручае. Трэба
быць не толькі старанным, але і хітраватым. У калектыве розныя людзі. Многія
жадаюць табе дабра, а для некаторых ты той аб’ект, на які можна зваліць усе
непрыемнасці. Асабліва бойся, асцерагайся падхалімаў, якія выслужваюцца перад
начальствам. Ім вельмі хочацца залезці да цябе ў душу, каб зразумець твой
настрой, твае адносіны да кіраўніцтва, выпытаць. Скажаш нешта кепскае пра
начальства – адразу ж пабягуць да яго і ўсё-ўсё данясуць, да драбіначкі, нават
прыбавяць ад сябе. Такім чынам яны ўзвысяцца, заслужаць ласку ў начальніка, а
цябе апусцяць.
Эксперт Таццяна.
-- З першага дня я стала прыглядвацца да
таго калектыву, у які прыйшла працаваць, бо ведала, што там могуць быць мае
канкурэнты, тыя людзі, якім здаецца, што займу іх месца. З імі старалася
трымацца, як кажуць, на адлегласці. А іншы раз і супакойвала, каб паказаць, што
на іх месца не прэтэндую.
Эксперт Марына.
-- Падобнымі канкурэнтамі могуць быць і
людзі прадпенсіённага ўзросту альбо пенсіянеры. Многія з іх не хочуць ісці на
пенсію. Ім хочацца атрымліваць і пенсію, і зарплату, каб мець болей грошай.
Асцерагайся такіх.
Эксперт Алесь.
-- Не канфліктуй з начальствам, Пятрусь.
Ад начальства многае залежыць, у тым ліку і тваё будучае.
• А што пра гэта думаеце Вы, нашы чытачы?
