ВЫВУЧАЕМ
БЕЛАРУСКІ ПРАВАПІС: ПРАКТЫКУМ
Тэма: правапіс
канчаткаў назоўнікаў другога і трэцяга скланення ў множным ліку.
Псіхалагічны настрой.
Дошка, шчэпка,
Цудоўны, яловы --
Гэта словы нашай мовы.
Аляксей Якімовіч.
• Якія
словы беларускай мовы вам запомніліся, падабаюцца?
Успомнім! Да другога скланення адносяцца назоўнікі мужчынскага роду з нулявым
канчаткам у назоўным склоне і назоўнікі ніякага роду з канчаткамі –о,
-ё,
–е
- ў назоўным склоне [6, стар. 166, “Беларуская мова”].
Напрыклад: альбом,
поле.
Ствараем праблемную сітуацыю.
• Як пішам: крок – крокаў ці крокоў, ясень – ясеняў ці ясенеў?
(1)
• Як пішам: стол – сталоў ці сталов, поле
– палёў
ці палёв? (2)
• Як пішам: вуха -- вушэй ці вушей? (3)
• Як пішам: правіла – правіл ці правілаў?
(4)
Што трэба ведаць, каб адказаць на гэта
пытанне?
Хвілінка кемлівасці.
Звяртаемся да правіла.
Запамінаем! Назоўнікі другога скланення ў родным склоне множнага ліку маюць
наступныя канчаткі:
–аў, -яў -- не пад націскам: крок – крокаў, жаданне – жаданняў;
–оў, -ёў –
пад націскам: сталоў, палёў;
-эй, -ей -- назоўнікі вачэй, вушэй, плячэй, гасцей, коней.
Некаторыя назоўнікі могуць ужывацца з нулявым канчаткам і
з канчаткам –аў [4, стар. 240 -- 241, “Беларуская мова”].
Напрыклад: правіл і
правілаў.
• Дапоўніце
гэтыя азначэнні адпаведнымі прыкладамі з задання “Ствараем праблемную
сітуацыю”.
Назавіце слова.
Пішам з ей, эй, яў, ёў
Дзяцей, ласёў,
Плячэй, гасцей,
Вучняў, … (сяброў).
Аляксей Якімовіч.
• Растлумачце
правапіс канчаткаў у словах вершаванага
тэксту “дзяцей”, “ласёў”, “плячэй”, “гасцей”, “вучняў”, “сяброў”.
Адзначаем! Некаторыя назоўнікі другога скланення ў родным склоне могуць ужывацца
з нулявым канчаткам і з канчаткам –аў: балота -- балот і балотаў. Але: дзён, дрэў, сёл [4, стар. 240 -- 241, “Беларуская мова”].
Працуем са спалучэннямі слоў.
• Са словам
“акно” прыдумайце спалучэнні слоў з прамым і з пераносным значэннем.
• Ці
з’яўляюцца гэтыя спалучэнні слоў словазлучэннямі?
Для даведкі: драўлянае акно – акно ў Еўропу.
• Слова “акно” пастаўце ў форме
роднага склону множнага ліку. (Акон і
вокнаў.)
Фізкультхвілінка.
На столі, на сцяне вачыма намалюйце прыгожыя спалучэнні
літар аў, яў, оў, ёў, потым напішыце беларускае слова “воблакаў” і лагодна
ўсміхніцеся, прывітайце яго, добрае і ласкавае.
Успомнім! Да трэцяга скланення адносяцца назоўнікі жаночага роду з нулявым
канчаткам у назоўным склоне [6, стар. 166, “Беларуская мова”].
Напрыклад: восень.
Ствараем праблемную сітуацыю.
• Як пішам: мыш
– мышэй
ці мышаў, адлегласць -- адлегласцей ці адлегласцяў? (1)
• Як пішам: рэч
– рэчаў
ці рэчэй, таполя – таполяў ці таполей? (2)
• Як пішам: арцелей ці арцеляў? (3)
Што трэба ведаць, каб адказаць на гэта пытанне?
Хвілінка
кемлівасці.
Звернемся да правіла.
Запомніце! Назоўнікі трэцяга скланення ў родным склоне множнага ліку звычайна
маюць канчаткі –эй, -ей.
Некаторыя назоўнікі маюць канчаткі –аў, -яў.
Асобныя назоўнікі могуць ужывацца з рознымі
канчаткамі.
Напрыклад: мышэй, адлегласцей; рэчаў,
столяў.
Але: грошай; арцелей і арцеляў, сувязей і сувезяў [4, стар. 240 -- 241, “Беларуская
мова”].
• Дапоўніце
гэтыя азначэнні адпаведнымі прыкладамі з задання “Ствараем праблемную
сітуацыю”.
Для даведкі: арцель –група людзей, якія аб’ядналіся для сумеснага выканання
якой-небудзь працы [1, стар. 40, “Тлумачальны слоўнік”].
Назавіце слова.
Пішам з яў, эй
Далоняў, начэй,
Прыстаняў, даляў,
Завадзяў, … (мышэй).
Аляксей Якімовіч.
• Растлумачце
правапіс канчаткаў у словах вершаванага тэксту “далоняў”, “начэй”, “прыстаняў”,
“даляў”, “завадзяў”, “мышэй”.
Для даведкі: завадзь – невялікі заліў
возера або рэчкі з запаволеным цячэннем [1, стар. 124, “Тлумачальны
слоўнік”].
Праца са сказам.
Складзіце скорагаворку са слоў.
За, шмат, сенажацей,
сялом, нашым. (За нашым сялом шмат
сенажацей.)
• Растлумачце
правапіс выдзеленага слова. Ці можа яно
ўжывацца ў дзвюх формах: сенажацей і
сенажацяў?
Ведайце! У творным склоне назоўнікі ўсіх трох скланенняў маюць канчаткі –амі,
--ямі
[4, стар. 242, “Беларуская мова”].
Напрыклад: мышамі, ласямі.
Праца з вершам.
Складзіце разбураны нядобрым чараўніком верш Аляксея
Якімовіча.
І квяцістымі лугамі,
Беражыце зямлю нашу!
І зялёнымі лясамі.
Яна радуе палямі,
Адказ: 1 – 2, 2 – 4, 3 – 1, 4 – 3.
• Знайдзіце
ў вершы словы з арфаграмамі на вывучанае правіла. Растлумачце іх напісанне.
Запамінаем! Некаторыя назоўнікі другога і трэцяга скланенняў могуць ужывацца і з
канчаткам –мі (тады перад канчаткам пішацца мяккі знак): конямі і коньмі, касцямі і касцьмі [4, стар. 242, “Беларуская мова”].
[5, “Беларуская мова”]
Скорагаворка.
З
коньмі беглі каля гусей (Аляксей Якімовіч).
• Ці
паўтараецца вывучаная арфаграма ў словах скорагаворкі?
Сустрэча з
фразеалагізмамі.
Назавіце фразеалагізмы ў вершах Аляксея Якімовіча, якія
абазначаюць “зазнавацца, фанабэрыцца, задавацца” і “зусім сур’ёзна, на самай справе”.
Задавака наш Алесь.
Хоча быць як бос.
Часта ён у класе
… … .
-- Працуйце старанна,
Дбайна, без агрэху, --
Стануць
паважаць вас…
… … .
• Назавіце
назоўнікі другога скланення ў вершаваных тэкстах. Адзін з іх пастаўце ў множным
ліку і праскланяйце.
Словы фразеалагізма,
напісаныя наадварот: еаріздаз сон, ачарпа ухемс [2,
стар. 20, 102, “Фразеалагічны слоўнік”].
Узбагачаем мову словам Якуба
Коласа.
Раскрываючы дужкі, запішыце словы з выбарам літар.
Выразна прачытайце вершаваныя радкі Якуба Коласа.
Жыццё ў
замку йшло без змены.
Раз
заве(д, дзе)ны там лад
Не
парушваўся, бы сцены, --
Цвёрды чыйся быў загад.
Ды на
свеце ўсіх здарэнняў
Не
прадбачыць і мудрэц,
А
прыходзіць разбурэ(н, нн)е;
Дзе пачатак,
дзе канец,
Дзе
іх схованы прычыны –
Не
ўсім сцяміць і згадаць,
Але
грозныя навіны
Сталі замак засмучаць [3,
стар. 417 -- 418, “Паэмы Я. Коласа”].
• Якім
словам можна замяніць слова “чыйся”? (Чыйсьці.)
• Пастаўце ў форме роднага і
творнага склонаў множнага ліку назоўнікі другога скланення, выкарыстаныя ў
вершаваным тэксце.
Адказы на пытанні.
• Якія канчаткі маюць назоўнікі другога
скланення ў родным і творным склонах множнага ліку?
• Якія канчаткі маюць назоўнікі трэцяга
скланення ў родным і творным склонах множнага ліку?
Тэст.
Назавіце назоўнікі, якія напісаны правільна.
1) Дрэў;
2) дрэваў;
3) пячэй;
4) печаў;
5) мурагоў;
6) касцьмі;
7) дней.
Адказ: 1, 3, 4, 5, 6.
Выкарыстаная літаратура
1. Баханькоў,
А. Я. Тлумачальны слоўнік беларускай мовы: для сярэдняй школы / А. Я.
Баханькоў, І. М. Гайдукевіч, П. П. Шуба. – 2-е выд., перапрац. і дап. -- Мінск : Нар. асвета, 1972. – 376 с.
2. Гаўрош,
Н. В і інш. Фразеалагічны слоўнік. Для сярэд. школы. Пад рэд. доктара
філалагічных навук Ф. М. Янкоўскага. –
Мн., “Нар. асвета”, 1973. – 352 с.
Перад загал. аўт. : Н. В.
Гаўрош, І. Я. Лепешаў, Ф. М. Янкоўскі.
3. Колас, Я.
Новая зямля; Сымон-музыка : паэмы / Я. Колас. —Мінск : Маст. літ., 1986. — 448
с.
4. Красней, В. П.,
Лаўрэль, Я. М. Беларуская мова : Падруч. для 5-га кл. шк. з беларус. мовай
навучання. – 3-е выд., дапрац. – Мн. : Нар. асвета, 1992. -- 318 с. : іл.
5. Беларуская мова : вучэб. дапам. для 6-га кл. устаноў
агул. сярэд. адук. з беларус. і рус. мовамі навучання : у 2 ч. / Г. М. Валочка
[і інш]. – Мінск : Нац. ін-т адукацыі, 2020. --
240 с.
6. Шэўчык, Н. І.,
Амяльковіч, А. А. Беларуская мова : Падручнік для 4-га класа. – Мн. : Нар.
асвета, 1977. -- 240 с. : іл.
Гэты ўрок (у ім
могуць быць некаторыя змяненні) надрукаваны ў часопісе “Беларуская мова і
літаратура”, май 2021 года, № 5.