Быў выпадак
Самагонны камбайн
Гэта адбылося на тэлебачанні. Дыктару даручылі прачытаць
тэкст пра поспехі аднаго з заводаў (назавём яго “Н”). Дыктар узяла падрыхтаваны
супрацоўнікамі тэкст і старанна прачытала: “Завод “Н” нядаўна выпусціў мільённы
самагонны камбайн”. На другі дзень у студыю тэлебачання сталі тэлефанаваць
усхваляваныя тэлегледачы. Іх цікавіла адно пытанне: дзе можна набыць самагонны
камбайн? А ўсё з-за таго, што дыктар замест “самаходны” прачытала “самагонны”.
А гэты выпадак адбыўся ўжо са мною.
Каля пад’езда маладая жанчына мые, выцірае легкавушку.
Вітаюся з ёю і заходжу ў пад’езд. Праз нейкі час выходжу на двор і зноў бачу:
тая ж маладзіца мые, выцірае легкавушку. Захацелася сказаць ёй штосьці
прыемнае, такое, каб парадавала яе, падняло настрой. “Ты так старанна мыеш!” –
у захапленні прамовіў я. Маладзіца скрывілася і незадаволена паглядзела на
мяне: “Чаму вы лічыце, што странно?” Прыйшлося ёй растлумачыць, што рускае
слова “странно” яна пераблытала з нашым, беларускім “старанна”.
Вось як бывае!
Аляксей Якімовіч