Быў выпадак
Не там рамантавалі
Гэта
здарылася ў суседняй Расіі. Там на адной адміністрацыйнай тэрыторыі знаходзяцца
два населеныя пункты з адной і той жа назвай: умоўна назавём іх Навасёлкі-1 і
Навасёлкі-2.
Жыхары Навасёлак-1 некалькі
гадоў запар пісалі і пасылалі скаргі ў розныя інстанцыі: адрамантуйце ў нашай
вёсцы вуліцу, бо па ёй, асабліва вясною і восенню, як гаворыцца, ні праехаць,
ні прайсці. Вышэйстаячае начальства, не вытрымаўшы такога націску абураных
жыхароў, выдзеліла патрэбную суму грошай на рамонт вуліцы ў Навасёлках-1.
Неўзабаве будаўнікі з дарожнай
арганізацыі прыехалі ў Навасёлкі-2 (гэту вёску, не разабраўшыся, яны
пераблыталі з вёскай Навасёлкі-1) і шчыра ўзяліся за працу: пачалі там
даводзіць да ладу вуліцу, якая таксама патрабавала тэрміновага рамонту. Жыхары
Навасёлак-2, вядома ж, узрадаваліся: яны не чакалі такога вялікага падарунка.
Раніцай, выйшаўшы з хат, пазіралі на будаўнікоў і ўсміхаліся, задаволеныя,
ашчасліўленыя. Але іх радасць працягвалася нядоўга. Праз нейкі час грошы ў
будаўнікоў скончыліся, і яны пакінулі вёску, так і не давёўшы працу да канца.
Аказалася, што вуліца ў Навасёлках-2 была значна шырэйшая і даўжэйшая, чым у
Навасёлках-1 і, канешне, патрабавала большых затрат на яе рамонт.
Цяпер скаргі ў вышэйстаячыя
органы ідуць не толькі з Навасёлак-1, але і з Навасёлак-2.
Аляксей Якімовіч
