Сінонімы са словам кавалак
Помніце! Сінонімамі з’яўляюцца словы,
аднолькавыя або блізкія па значэнні.
•
Звярніце ўвагу на тое, як пішацца слова: кавалак.
•
Да якой часціны мовы адносіцца слова кавалак?
Д л я д а в е д к і: адказвае на пытанне ш т о?
•
Сінонімы да слова кавалак
(адно слова тут “лішняе”).
Скіба, крошка, абломак,
чарапок, дрэва, ашчэпак, луста, аполец, акраец.
•
Якія з гэтых слоў, як вы лічыце, а) аднолькавыя па
значэнні; б) блізкія па значэнні?
Эксперт Змітрок.
-- Сінонімы скіба, луста, як мне здаецца, аднолькавыя
па значэнні. Так звычайна кажуць пра кавалак хлеба.
Эксперт Насця.
-- Сінонімы кавалак, акраец, так лічу, складаюць
яшчэ адну групу аднолькавых па значэнні слоў. Акраец – кавалак з краю бохана (хлеба).
Эксперт Алеся.
-- Сінонімы кавалак, крошка складаюць групу блізкіх
па значэнні слоў. Крошка значна
меншая па сваіх памерах, чым кавалак.
Эксперт Міхась.
-- Словы абломак, чарапок, ашчэпак, аполец блізкія
па значэнні. Абломкам можа быць тое,
што абламалася, напрыклад, кавалак шыферу, чарапок
– кавалачак ад разбітага посуду, ашчэпак –
тонкі кавалачак ад пасечанага дрэва, шчэпка, аполец – кавалак сала.
•
А як лічыце Вы, нашы шаноўныя чытачы?
•
Прачытайце. Выберыце з дужак патрэбны сінонім.
1. (Чарапкі, абломкі)
ад разбітай талеркі ляжалі на падлозе. 2. Сымон прынёс у хату (ашчэпак, аполец)
сала. 3. Сымон трымаў у руках вялікую (лусту, крошку) хлеба.
•
Ці з’яўляюцца сінонімамі словы кавалак і драбок? Як вы
лічыце?
Выкарыстоўвайце толькі для кантролю, каб праверыць сябе
Д л я
д а в е д к і (словы-адказы напісаны наадварот).
Гэта кінўозан;
“лішняе” слова авэрд (не з’яўляецца
сінонімам); 1 – ікпарач, 2 – целопа, 3 -- утсул; аццюялўя’з.
Распрацаваў Аляксей Якімовіч